Mizo mipuiin Citizenship Amendment Bill an duh loh laiin MNF chuan a duhtute an thlawp avangin Mizo hnam leh sakhaw dinhmun him loah an dah phah tawh tih Congress president Lalsawta chuan a sawi.
Zirtawpnia MPCC inkhawmah Lalsawta chuan sakhaw zalenna dodalna thlipuiin India ram a run a, sakhaw zalenna dotuten kan ramah bu an khuar tawh a, Manipur-ah kan unauten nasa takin an tuar mek tih sawiin, “Hei hi Kristian leh Hindu sakhua indona a ni. UCC leh sakhaw zalenna duhlotute do tur hian Kristiante kan tanrual a ngai. Hun kal tawhah Mizoram mipuiin nasa takin CAB kan do a. Mahse MNF chuan an ‘amen’ a, an kutah an intulut a, kan hnam leh kan sakhua dinhmun him loah an dah. Kan hnam leh sakhua, kan dinhmun titleutu hi Congress party chuan kan do zel dawn,” a ti.
Kumin inthlanah kan hnam leh sakhua a him leh him loh a hril dawn, tiin, kohhran leh NGO, political party te pawh kan hnam lungphum tihnghina awm mek do pui turin a sawm tih a sawi a ni.
Mizoramah HIV, drugs, eirukna leh thluaka sum lut natna a hluar hle MPCC hruaitu hian a sawi a. Ral atangin heng hi a thlirtu kan ni thei lo tih sawiin, “Politics hmanga do let a ngai. Politics a tha lo, titute chu mi tha lo te hnuaiah an kun tho ang. Heng mi tha lo te hnuaia kan kun lohna turin mi tha te lo chhuak ula, keini leh chhuan lo la awm zel turte tan ram tha zawk din ang u,” a ti a. Congress party chu ram siamthatna inpui a ni tih a sawi.
MNF-in kan hnam leh sakhua dinhmun him loah an dah – Lalsawta
