MNF-in tihhlawhtlin loh an ngah Mau pawh an sawi peih tawh lo
– Dr Lalmalsawma
MNF chuan an flagship programme SEDP bakah health care, PAHOSS leh mauah te an hlawhchham vek tih Congress treasurer Dr Lalmalsawma Nghaka chuan a sawi.
Tunhnaia MNF adviser leh cabinet minister Pu Lalruatkima’n thuthar thehdarhtute hmaah an party manifesto zaa 80 tihlawhtling tawh anga a insawi chu thu belhchian dawl lo leh mipui rilru hruaikawi tumna a nih avangin a nihna dik tak tarlan tula an hriat thu MPCC treasurer hian a sawi a. 2018 inthlan dawnah SEDP chu MNF hotute ka atanga hriat tur a tam hle a, Mizorama chhungkua zawng zawng, NLUP dawng tawhte pawh huam vekin chhungtinin cheng nuai thum an dawn tur thu chu an hotupa phei chuan a sawi nasa hle tih a sawi.
“Tun dinhmunah SEDP hi chhungkaw 120000 in dawng tawha chhut a ni a. First phase-ah chhungkaw 60000 hnenah Rs. 50000 theuh pek an ni tawh a, an tiam nuai 3 atanga chhut chuan 16% chauh an dawng tihna a ni. 2nd phase ah chhungkaw 60000 hnenah Rs. 25000 theuhin 1st instalment an pe a, hei hi an tiam nuai 3 atanga chhut chuan 8% vel an dawng hram. 3rd phase erawh membership drive leh campaign fund atana hman an tum chu chunglamin a remti lo a ni ang, model code of conduct puan avangin an che thei ta lo,” a ti.
MNF-in SEDP Board 14 a din chuan vice chairman leh members atan thiamthil bik nei em em pawh ni lo, party mi duhsak zawng an inruat a. Board tin hman tur lirthei 2 theuh, support staff nen pek niin, hemi atan hian thlatin cheng nuai 37 hmanral a ni a, kum khatah nuai 444 khawhral anga chhut a ni tih Dr Lalmalsawma hian a sawi. SEDP Board-ten eng hlawhtlinna nge an neih tih mipuiin an hrechak tih a sawi a ni.
Mizoram State Healthcare Scheme ah MNF-in cheng nuai 2 theuh chhungkaw tin tan an tiam laiin, damlo enkawlna cheng vaibelchhe 63.88 chu an la pe thei loa, an batsak mek tih sawiin, He healthcare scheme hi mipuiin inbumna mai nia an ngaih avangin kumin 2023- 2024 chhung hian enrolment pawh 32.75% in a tlahniam duai a. Mipui tawrhna nasa tak, thenkhat phei chu kum 2 chuang bill tang nghak tawhte hian healthcare-ah kan sawrkar hrawn mek hi hlawhtling an tih a rinawm lem loh,” a ti. Cheng vbch. 150 lai SEDP atanga healthcare scheme atana an dahhran tawh awmna sawi turin a phut tih a sawi bawk.
MPCC treasurer chuan:
4Cheng vbch. 19.95 sengsoa Lengpui Airport siamthat a chim rup a, airport sak lai chim avang hian hrem an awm tawh em? Tute nge mawhphurtu tih hi mipuiin an hre duh tih a sawi.
4CM-in ‘Traffic Jam Free City’ a Aizawl siam a tumna kawnga pakhat – PAHOSS ah 403 phalna pek tawh atangin parking space 11 chiah hawn a la ni a. 2.7% chiahin an tihlawhtling tihna a ni a, parking lot dang 392 hi engtin nge ni zel dawn tih a zawt.
4MNF manifesto-ah contract leh supply chungchangah mumal zawka kal an tum thu a lansarh viau laiin, Kamrul leh Zoramchhana vulh chiam chu an hmalakna langsar a ni, tiin, Kamrul Laskar ringawt hian sawrkar atangin contract cheng vbch. 11643 a hmu tih a sawi.
4NECS inrawlhna cheng vbch. 4.88 ho lam taka khawhralna Darlak to Sihthiang village road leh, vbch. 1387.5 central atanga fund rawn kal hmangin restricted tender 109 chu CM chan PWD-in ni 11 chhung lekin an pass fel hman tih a sawi.
4Mizoram State Lokayukta chairperson chuan hna thawk tak tak turin sawrkarin a thuam tha tawk lo tih a sawi thu sawichhawngin, a hmingin Lokayukta chu ha nei si loin an din a. Airport renovation chungchanga CM laka case thehluh serious tak pawh hmasawnna a awm hleithei lo reng tih a sawi.
4Mizoram Lokayuta hian case pahnihah CBI ko lut tura a tih chu Mizoram sawrkarin a ko lut duh lo tih a sawi.
4CM buaipui em em, mau chungchang chu a hlawhtling tawk lo nge, tumahin an sawi tha peih tawh loa. Lengpui leh Hmunpui lama pilot project an tihte pawh a hlawhtlinna tih lan tur a la awm lo a, a nursery leh a chi supply kaihhnawih vela hlawhtling ta te chanchin pawh chiang zawka hriat mipuiin an chak tih a sawi.