MNF-in UCC sawiho an duh
Parliament-ah pulut dawn lo
Parliament thutkhawmah Uniform Civil Code Bill chu chhawpchhuah zingah a tel dawn loa, MNF chuan sawiho hrim hrim nise an duh thu an sawi thung.
Parliament Monsoon Session thlirlawkin July 19 khan Union Defence minister Rajnat Singh kaihhruaiin Parliament Library Building Committee Room-ah All Party Leaders meeting neih a ni a, Mizoram MP pahnih C Lalrosanga leh K Vanlalvena te telin, Session chhunga sawiho tur Bill chhawpchhuah tum 31 thlirlawk a ni.
MNF party aiawha thusawitu C Lalrosanga chuan Manipur buaina chungchang chu Parliament Session laiin sawiho ngei tul a tih thu te, mipui tamtak nunna leh bungrua a luanral tawh avangin a rang thei ang bera buaina tih tawp a tul thu te, thenawma awm an nih avangin raltlan tamtak Mizoramah an rawn luh thu te, sawrkar, kohhran, NGO angte leh mimalin an theihtawpin an puih thin thu leh, sawrkar laipuiin chhawmdawlna Mizoram sawrkar kuta a pek ngei a tul thute a sawi. Tunhnaiah Prime minister-in UCC chungchang a sawichhuah thar avangin Parliament Session-ah Bill anga a lut lo a nih pawhin sawihona hun siam ngei nise, an duh loh chhan chiang taka sawifiahna hun siam law law tha a tih thute a sawi.
Tun tum Parliament Session-ah hian Bill 31 sawiho tura chhawpchhuah a ni a. Chu’ng zingah chuan sakhaw tlem leh tribal hnamte ngaimawh, UCC Bill erawh chhawpchhuah zingah a tel rih lo a ni.
MNF-in UCC sawiho an duh Parliament-ah pulut dawn lo
