MNF a sawrkar chhunzawm a nih chuan Mizoram thalaite eizawnna leh hnathawh bul tan puina tur Youth Oriented SEDP an kalpui dawn tih MNF adviser Prof F Lalnunmawia chuan a sawi.
MNF adviser hian an sawrkar flagship programme – Family Oriented SEDP chu sum harsatna hrang hrang karah kalpuiin, eizawnna kawnga leirem rahtirna tura bul tanna atan chhungkaw 60000 hnenah Rs. 50000 theuh pek an ni tawh a, chhungkaw 60000 hnenah Rs. 25000 theuh pek an ni tawh a. Chhungkaw 60000 dang thlan leh mek a nih laiin, inthlan puanin nangchingin, chawlh rih a ni tih a sawi. Pathian leh mipui duhsaknaa sawrkarna an chan hunah heng hna kal mek hi chak taka bawhzui an tum tih a sawi bawk.
MLA Election Manifesto 2023-a MNF-in a tarlan, Zoram thalaite eizawnna leh hna thawh bul tanpuina tur, Youth Oriented SEDP tum ber chu, thalai eizawnna nghet neilote tana eizawnna kawng kawhhmuh leh chumi atana an bul tanna tur sum ngaihtuah sak a ni dawn tih sawiin, Zoram thalai, state chhung leh pawn lama hna thawk leh hna zawng turte tan Entrepreneurship Development Programme kalpui a ni dawn tih a sawi.
“Mizo thalai zingah pianphung thiamna leh theihna tam tak nei, mi harhvang, thil mawi leh nalh hre tak, huaisen leh rilru changkang tak tak an tam a. Heng finna leh thiamna hi mumal taka hman tangkai a nih chuan nasa takin hma kan sawn thei dawn a. Thalaite pianpui finna leh theihna hi eizawnna atan hman tangkai tir kan tum a, SEDP hmangin skills development lam uar a ni ang,” a ti.
He policy-ah hian thalai talent neih thatna hriatchian tumin, an thiamna leh theihna hna leh sum leh paia chantir tura hma lak an tum tih Prof F Lalnunmawia hian a sawi a. Planning department, LESDE leh Mizoram Youth Commission hmang tangkaiin, mumal taka ‘channel’ siamin Youth Oriented SEDP kalpuina atan hian budget-ah fund tam zawk dah a ni dawn tih a sawi a ni.
A kalpuina tur hian mimal, thian leh pawl ho (society /company) anga eizawnna kawnga hmalakna ngaihtuah puiin, helama tuimi thalaiten an tuina leh hnathawh duhzawng (trade) ah project plan & proposal siamin sawrkarah an thehlut anga, chu’ng project chu sawrkarin an bultanna tur sum a ngaihtuah sak dawn tih a sawi.
Youth Oriented SEDP atan hian eizawnna hrang hrang bakah infiamna lam leh paramedical & nursing ah SEDP hmanga sponsor an ni anga, Mizoram Techno-Park dinin, thalai rual, mahni kea din duhte tan kawng hawn a ni dawn tih a sawi a ni.
MNF-in Youth Oriented SEDP kalpui turin duang
