BJP tan chuan Congress party-in ram a tihchhiat zel lohna atana beih a ngai a, MNF leh ZPM chu an naute an nih avangin an tan beih a ngai hran lo tih BJP State secretary Dr Zonuntluanga chuan a sawi.
Nilainia thuthar thehdarhtute a kawmnaah Dr Zonuntluanga chuan Congress party-in BJP a puhna hrang hrangah thudik lo a tam tih a sawi a. Foreign atanga tanpuina dawn pawh tihtawp a awm loa, firfiak pawlte thlenga an lo hman tangkai thin avangin utilization certificate erawh neih that a ngai tih a sawi.
BJP-in Hindu-a min leh vek an tum anga insawi thaih pawh Mizote tan Hindu nih theih dan a awm lo hrim hrim a; Mizoram chu Mizo Kristiante ram a ni reng dawn tih a sawi.
Congress chu ICU-ah ventilator hmangin an la nung ve tawk tawk a, hun tlemte an la neih chhungin BJP nasa takin an bei tih BJP State secretary hian a sawi a. Tunhnaia India rama thil thleng hrang hrang leh dan hrang hrang siamthat tum chungchangah Congress party-in BJP chu nasa takin dawt hmangin a puh tih a sawi a ni.
Delhi chief minister thil tih dik loh avanga man a nih chungchangah a hektu chu Congress party an ni tih a sawi a. An thangah an awk ta niin a sawi. AAP a chhiatin Congress-in a hlawkpui ber dawn a, BJP tan awmzia a awm vak lo, BJP tan political interest a awm lo, CBI leh ED te BJP-in a thuhnuaiah a dah lui lo hrim hrim bawk niin a sawi.
MNF leh ZPM chu kan naute – Dr Zonuntluanga
