MNF leh ZPM-in candidate tur la tifel kim lo

Mizoram inthlanpui lo awm tur atan political party-
te an inbuatsaih mek a, party liante chuan candidate tur pawh an tifel thawkhat tawh. MNF leh ZPM-in an la tifel kim lo tih chauh a ni.
Sorkarna chang mektu MNF hian bial tam zawk chu thla tir lamah khan an tifel tawh a, bial hnih an la bak nia ngaih a ni.
Chalfilh biala ding tur leh Aizawl South II-a ding tur an la tifel lo a, an tihfel thuai a rinawm tih thu dawn a ni.
MNF hian MLA 27 an nei a, bial awl 13 an neihte pawh hi thla tirah khan an tifel tawhah ngaih a ni. MLA ding laite zingah Hrangturzo bialtu Lalchamliana, home minister a ding dawn lo a, he biala ding tur hi tihfel a ni tawh.
Candidate tur puang hmasa ber ZPM-in Tuichawng biala ding tur an la tifel lo a, he biala ding tura beisei an nei mek nia ngaih a ni.
Thu dawn danin, Chakma Autonomous District Council-a an CEM RM Chakma chu ZPM-ah lutin candidate a ni mai thei a, chutiang chu thleng thei a ni mek.
MNF-in Tuichawng biala ding tur hian DD Chakma an tifel tawhah ngaih a ni a, mahse RM Chakma nen hian he biala din tum ve ve an ni. DD Chakma hi chiang tawha ngaih ni mah se ding lo thut thei ve tho chu a ni a, mahse a ding dawn a nih chuan RM Chakma hi ZPM-ah a lut turah ngaih a ni.
Congress party-in an tifel tawh a, an tihfel har ber Palak bial chu kar hmasa tawp lamah khan an tifel. A hmain bial dang zawnga ding tur chu an tifel tawh.
Palak bial hi Congress party-in MLA an neih mekna a ni a, mahse Palak bialtu KT Rokhaw chu MNF-a lut tura ngaih a ni. Congress party-in he biala ding tur hian IP Junior an tifel a, hei hi KT Rokhaw chu MNF-ah a lut dawn tih finfiahnaah ngaih a ni.