MNF MLA kan inhaivur lo – Lalrintluanga Sailo, MLA

MNF MLA-ten mahni inhaivur turin hma an la hman loa, ram tan ke an pen miah miah zawk tih MNF MLA Lalrintluanga Sailo chuan a sawi.
Thawhtannia MNF office, Mizo Hnam Runa inkhawmah MNF adviser ni bawk Lalrintluanga Sailo chuan Mizoramin harsatna nasa tak a rawh karah hruaitu tha leh rintlak, chief minister Pu Zoramthanga kan nei a. Pathian kaihhruaina changin mipuiin ei leh bar, nitin mamawh thilah harsatna lian lutuk tawk loin tun hi kan thleng tih a sawi. “Min beitute hian eng thil pawh ti ila min bei zel dawn a, mipui tan kan beihna kawngah kan tangmar zel dawn. MNF MLA 28-te hian mahni inhaivur turin hma kan la hman lo, ram tan kan pen miah miah mai a zawk a ni,” a ti.
Party thenkhat chuan consitution an nei lo emaw tih mai tura vice president te an inruat tawp tawp zel chu an party chhungah administration a felfai loh zia a hriat hle tih a sawi a. ZPM pawh vice president an ngah tawh lutuk chu an party chhungah buaina a tih tam phah tih a sawi.
Congress president Pu Lalsawta chu MNF MLA ni reng tawh thin, an party-a a awm lai pawh zawi ngiai ngiai an tih thin kha a ni tih Lalrintluanga Sailo hian sawiin, a kaihhruaina hnuaiah Congress an sawrkar ngai a ring lo tih a sawi. ZPM pawh nihna duh vanga mi beidawng kalkhawm leh awmkhawmna, an awm tawhna party atanga nihna beisei, an pek si loh lungawilo atanga beidawng an nih thu sawiin, an sawrkar a rinloh thu a sawi bawk. “Keini erawh Pu Zoramthanga kaihhruaina in administration fel tak kan nei a, chumi chuan min khalhngil zel a ni,” a ti.