MNF Legilature Party (MLP) chuan leader of opposition Lalchhandama Ralte hoin Hlimen khawtlang tangrualin relief camp an sak mek chu Nilaini khan an tlawh a. Relief camp tanpuina atan Rs 20000 an hlan.
Hlimen Relief Camp hruaitute chuan sawi danin, camp pahnih sak zawh tawhah in pahnihah hian chhungkaw 20 an riaklut tawh a. Relief camp-a awm duh, camp la sak loh avanga awmna nei lo chhungkaw 21 an la awm. Sawrkar atangin relief camp sakna atan sum an la dawng lo a, an dawn ngei an beisei tih an sawi. An veng dawrah nuai 20 chuang man a ba thlauin in sakna hmanrua an la tawh a. Sum an hmuh ran theih nan theihtawp chhuahpui turin MLA-te hi an lo ngen a ni.
MLP-te zawhna an chhan danin, Disaster Management & Rehabilitation minister-in an camp a la tlawh lo a. An bialtu MLA atangin camp sakna tur fund an dawng lo tih an sawi a ni.
Leader of opposition Lalchhandama Ralte chuan sawrkarin Hlimen Relief Camp sakna atan tun thlenga cheng khat pawh a la pe lo chu lungchhiatthlak an ti hle tih a sawi a. Khawtlang tangrualin nuai 20 chuang an seng tawh chunga sawrkar a la ngawi thei chu mak an tih thu a sawi. “Central sawrkarin chhiat tawkte chhawmdawlna tura India ram state-te min pek sum hi, hreng khawtlai lo leh pawtpeng loin pe chhuak zung zung turin sawrkar kan ngen a ni,” a ti.
Zemabawk lama chhiatna thlengah vanduaina tawk chhungte pawh instalment loin, a full-in tuamhlawmna leh ralna sawrkarin pe rang se an duh tih a sawi bawk.
“Chief minister-in phur takin Cyclone Remal avanga chhiat tawkte tuamhlawmna tur cheng vaibelchhe 15 ruahman a nih thu a sawi hnu ah thla khat a chuang tawh a. Heti chunga relief camp sakna pawh sum an la pechhuak thei lo hi a mak hle. Chhiatna tuartute an lainatawm takzet a ni,” a ti.
MNF MLA-ten Hlimen tlawh Relief camp atan sum pek phut
