MNF sa kah sa ZPM-in a chan
– Lalruatkima
Assam Rifles sawnchhuah chungchangah MNF sa kah sa, ZPM sawrkarin a chan a; MNF ruai buatsaih sa ZPM-in an kil ve chauh zawk tih MNF hruaitu Lalruatkima chuan a sawi.
Thawhtannia Mizo Hnam Run inkhawmah MNF treasurer Lalruatkima chuan Assam Rifles sawnchhuah an ni dawn ta chu lawmawm a tih thu a sawi a. Hemi chungchanga theihtawp chhuaha hma laa bul tantu, Pu Laldenga (L) leh Pu Zoramthanga kaihhruai MNF sawrkarin fak a phu tih a sawi a ni.
Lammual leh a chhehvel atanga Zokhawsanga Assam Rifles insawnna tur hi Pu Laldenga kaihhruai MNF sawrkarin kum 1987 khan a pe a, helai hmuna mimal ram neite hnenah cheng nuai 92 chuang zangnadawmna pek niin, 1988 May khan Aizawl DC leh AR aiawhten ram inhlanna certificate an ziak a. Land lease siamfel niin, AR-in he ram hi an cheibawl nghal tih MNF hruaitu hian a sawi.
MNF sawrkar vek hian mimal thiltitheiten AR chhuahsan ram an neih lohnan dan a siam a. Ministry of Home Affairs (MHA) atanga building leh thildang sakna tur sum an hmuh hmangin AR-in Zokhawsanga an hmunhma an cheithar ta zel a. Congress sawrkarin AR insawn chungchang hi tithuanawpin, Zokhawsangah niloin Khatlaa sawn an nih tur thu an puang tih Lalruatkima hian a sawi a ni.
2018 MNF sawrkar leh khan AR insawn chungchang hi buaipui chhunzawmin, chhuanlam an siamte a ngaihtuah sak zel a. Union Home minister Amit Shah chuan Zokhawsanga AR insawnna tur lungphum chu 2023 April 1 khan a phum a. An chhuahsan turah Laldenga Cultural Centre Foundation lungphum a phum nghal bawk tih a sawi.
MHA thuchhuak behchhanin khatihlaia MNF sawrkar chuan 2019 May ralhmaa AR insawn tur thu a lo sawi tawh a. 2023 March 23 khan sipai lirthei engemawzat hmangin bungrua, ralthuam leh a dangte nen an insawn a. A bo a bang awmloa insawnna tur erawh state sawrkar thuneihna piahlam a ni tih a sawi.
MHA duan MoU hi vawi duailo thlirho niin, AR chhuahsan tura mimal ram neite LSC cancel-na tur chu MNF sawrkar cabinet meeting-in 2019 March 8 khan a pawm a. AR hnenah memorandum of agreement draft thawn a ni tih a sawi bawk.
“AR insawnna leh a kaihhnawihah MoA hi 2024 October 23-ah ziah a ni leh a. He MoA hi MNF sawrkarin 2023 September 8-a a lo duan tawh ang deuh vek kha a ni. Chutihrualin Khatlaa an ram luah zui tur chu teh that a, chhiah chawi ve tura tih chu paih a ni a. Tui leh eng pek chungchangah leh AR-ten an chhuahsan in leh hmunhma man Mizoram sawrkarin a pek tur thu ah mipui leh sawrkar tana phurrit awm thei a ni a. Ngaihtuah manglo leh zirchiang loa duan a ang hle,” MNF treasurer hian a ti.
MNF sa kah sa ZPM-in a chan – Lalruatkima
