MNF sawrkar laiin adver’ chhuah loin hna 695 an la

MNF sawrkar laiin adver’
chhuah loin hna 695 an la
MNF sawrkar lai, 2018- 2023 chhung khan School Education department-ah advertisement chhuah loin hna 695 lak a ni a, a tha ber leh tling ber la loa an duhsak zawng an la a nih chuan zirna a ngaihtuahawm hle Congress president Lal Thanzara chuan a sawi.
Zirtawpnia Congress Bhavan-a inkhawmah Lal Thanzara hian hei hi a sawi a. 2018- 2023 MNF sawrkar laia NABARD sum puk vaibelchhe 3500 hmanga school sak leh repair chungchangah thil dik lo tam tak a awm nia ngaiin Congress Thalai-in Lokayukta-a thubuai an thehluh chu ngaihtuah mek a ni, tiin, “Thudik hre thuai turah kan inngai,” a ti.
Vanah leh leiah tuhrah kan seng dawn tih hrerengin politics-a hmalaknaah fimkhur a ngai tih MPCC president hian a sawi. MNF sawrkar laiin ‘thluaka sum lut’ leh ‘Kamrula’ a lar a, kan airport-a Kamrula hnathawh pawh CM hluiin Inrinni tin a enpui thin tih a ni, tiin, “Chuti chung chuan a nih tur ang a ni pha lo hle. Chu chu mipui tuh rah a ni,” a ti.
ZPM chuan an campaign laiin thil tha tinreng min tiam a, VIP culture nuaibo thlengin min tiam a, mah se, an insawi loh ang zelin an awm a, sawi sawi ngai loin mipuiin an hria tih a sawi. “Kum 15 daihin kawng kan siam ang, an ti a, thla khat pawh daih lo kawng an siam. Hei hi mipui tuh rah a ni,” a ti.
Duh se chuan ZPM chu thil tha tih theihna hun nei tha ber an ni, tiin, mithiam, celebrity leh mi tha tak tak nei mah se, tumna tak tak an nei loa, mi thenkhat chuan an term pawh an hman zawh an ring lo hial tawh niin a sawi bawk.
Congress sawrkar laiin NLUP hmangin mipuiin malsawmna tam tak an dawng a, eizawnna bul an tanna tur an dawng a, remna leh muanna a thleng a, sawrkar hnathawkte thla a muang a, ram thenawma kan unaute thlengin an thla a muang thin tih Lal Thanzara hian a sawi. “Chu chu mipui tuhrah a ni. Mipui hian an ngaihtuah chian a ngai a, kan tuhrah kan seng thin avangin uluk taka kan ngaihtuah a ngai a ni,” a ti.