MNF tana hnawk party chu Pathianin min thenfai sak zel – Zoramthanga

MNF tana hnawk party chu
Pathianin min thenfai sak zel
– Zoramthanga
MNF tana hnawk political party dang chu Pathian-in a thenfai sak zel thin niin an president Zoramthanga chuan a sawi.
MNF hian Nilaini khan Mizo Hnam Runah an din champha vawi 64-na an hmang a. Thusawitu MNF president Zoramthanga chuan, MNF chu mifing leh ropui ni bik loten an din a ni a. Mithiam ber leh mifing ber ni lo mah se, party lian leh ropui tak tak an ral tawh laiin, an ni chu kum 64 an kal tawh tih a sawi.
“MNF tana hnawk party dang chu Pathianin min thenfai sak zel thin. Pathianin min diptu hnim hlingneite min thensak dawnin, kan theihna leh chakna emaw kan tih mai lohnan MNF hi a tilianin a ti ropui kher ngailoa, a hun takah a dinchhuah tir leh mai thin. Heng hi hun kaltaah khan chiang takin a lang a ni,” a ti.
MNF chu an chhel a, chu chu an dam khawchhuahna a ni tih an party hruaitu hian a sawi a. Ruling party-a inpe pawh sawi tur an awm mang lo tih sawiin, party mite chu chhel taka awm a, an thuthlung vuan tlat turin a chah.
Sipai hnena vawikhat pek tawh chu laklet leh a harsa em em thin tih Zoramthanga hian a sawi a. “Kan airport neihchhun hi ZPM chuan cabinet-ah an lo pass daih tawh a. Party dang zawng zawng, NGO, zirlai pawl leh anmahni party ngei pawhin an duhloh a ni. MNF chuan a tawp thlengin kan dodal zel dawn a, chutiangin FCAA pawh MNF chuan fai hliauin a thian dawn a ni,” a ti.