Siaha district Palak Assembly biala MNF ticket-a ding tura sawmthluk, he bial atang veka Indian National Congress MLA ni lai KT Rokhaw chuan Assembly speaker hnenah MLA atanga a banna a thehlut. Thawhlehni khan KT Rokhaw hian Assembly speaker Lalrinliana Sailo hnenah ziakin Palak bialtu MLA a nihna atanga a banna hi a thehlut a. Speaker hian a lo pawmsak nghal a ni.
Banna a thehluh hnua thuthar thehdarhtute zawhna chhangin KT Rokhaw chuan, MLA inthlanpui kan hmachhawn mekah Siaha leh Palak Assembly bial chu Mara Autonomous District Council huamchhunga awm a ni a; thla 6 vel kalta khan MADC hian inthlanpui neiin, seat 25 awmah BJP-in 16, MNF-in seat 5, INC-in seat 3 an la a, BJP hian sawrkarna a siam a. A bial Palak huamchhungah MDC bial 14 awmin heng zinga 12 hi BJP hian a la a, MNF leh INC-in pakhat ve ve a la tih a sawi.
Mara ram politics kal vel dan hi MNF chuan zirchiangin, amah (KT Rokhaw) chu Congress MLA ni mah se, an party candidate ni turin an rawn sawm ta a. A bial chhung khaw tin fangin bial mipui ngaihdan a lak hnu ah an sawmna hi a pawm ta a. Kumin MLA inthlanpuia Palak biala MNF candidate ni turin Congress party-a primary member a nihna leh MLA a nihna chu a bansan ta tih a sawi a ni.
Zawhna chhangin, Mizorama state-a sawrkarna chelhtute kal danah term hnih zel a nih deuh avangin term tharah pawh MNF-in sawrkarna a la chelh zui dawn nia a ngaih thu KT Rokhaw hian a sawi a. A bial mipuiten opposition bial nih an nin tawh avangin he thuthlukna hi a siam phah ve bawk, tiin a sawi.
Palak bial atang hian KT Rokhaw hi tum thum thlantlin a lo ni tawh a, Congress ticket vekin a ni.
MLA atanga ban ngai an la awm – Speaker
Mizoram Assembly speaker Lalrinliana Sailo chuan kumin MLA inthlanpuia din nawn an tum a nih chuan tuna MLA nilai zingah pawh an ban phawt ngai an la awm tih a sawi.
The Aizawl Post zawhna chhangin speaker chuan, Palak biala INC ticket-a tling KT Rokhaw ang deuh bawk hian, 2018 inthlana independent-a ding zingah, ZPM official ticket-a dinga MLA-a tling nawn leh ta Pu Lalduhoma tih loh, independent-a ding zinga MLA nilaite chu, tun inthlanah political party official candidate an nih dawn chuan, tuna an nihna hi an bansan ve phawt a ngai dawn tih a sawi.
“Election Commission hriatpuina in independent candidate-in nomination an file a, chutiang bawk chu State Legislative Assembly speaker hnenah pawh an in ‘declare’ dan a ni. Bang loin party hming hian ding nawn leh ta se, hektu an awm chuan danah disqualify theih an ni a, anmahni pawh ka hrilh tawh,” a ti.
2018 MLA inthlanah khan ZPM chu ECI pawmpui political party a la ni loh avangin an party thlawp candidate-te chu independent-in an ding a, House-ah pawh ‘Zo Legislature Party’ tia invuahin, pawmsak an ni. ZLP group leader Lalduhoma erawh, MLA a nihna atanga disqualify a nih hnu ah, ZPM official candidate niin by election-ah a tling leh ta a ni.