MNF vote chhan tur la nei nia inhria chuan vote leh chhin se, an tih fuh a ring lo tih Congress senior vice president Lal Thanzara chuan a sawi.
Thawhtanni zana Aizawl North-III Block Mahila Congress Committee bultuma Edenthar BSUP-a hun an hmanah MPCC senior vice president chuan MNF party-in a intiamna pakhatmah tihlawhtling loin an sawrkar hun chhung an liampui dawn tih a sawi a. SEDP cheng nuai 3 an intiam chungin Rs. 25000 chauh an sem tih sawiin, “An vanduai a, mifel MLA tha tak tak an nei chungin mipui rintlak sawrkar an nih loh zia a langchiang hle,” a ti.
MNF sawrkar hnuaiah Pu Zoramthanga hoa kut tling loa sum lak a tamzia te, Vai contractor an hausak ziate ngaihtuah chiang tura mipui sawmin, “Kawng chhawng a awm tawh em ni; North East Democratic Alliance-a BJP an thawhpui atang hian an inhnukdawk tawh em. Chu chu zirchiang ang u. Vote chhan tur in la neih chuan lo vote leh chhin mah rawh u, in ti fuh hauh lo ang tih ka ring,” a ti.
ZPM-in kalphung thar, tia enchhin tura an sawm thu Lal Thanzara hian sawiin, “Chief minister-a an tawktarh chu Pu Lalduhoma a ni. A party din ngei pawh chhuahsan duhtu hi kan enchhin a ngaihna a awm lo. Mizoram mipuiin enchhin hi kan ba loa, a thusawi tam tak leh amah a dik tawk lohzia hi enchhin ngai loin a lang sa tawh a ni,” a ti.
BSUP-ten MNF sawrkar hnuaiah tui an tlachham tih an hriat sawiin, sawrkarna an pek chuan he harsatna hi an sukiang dawn tih Congress hruaitu hian a sawi. “Kan ti ang, kan tih kan tih mai thinna hian kan rawn phuhruk sak dawn che u a, kan ti hlawhchham lo ang che u,” a ti. BSUP dinsaktu Congress party chu thlangtling tura ngenin, an tan a nih piahlamah Mizoram mipui tan sakhaw zalenna duhtu Congress party chu Pathian rinchhanin a ding leh dawn tih a sawi a ni.
MNF vote leh chhin ru, in ti fuh lo ang tih ka ring – Lal Thanzara
