Modi-a leh Trump-a’n phone-in buaina sawi dun
Indian Prime Minister Narendra Modi-a leh US President Donald Trump-a te chu Thawhlehni khan phone-in an inbia a, Middle East-a thil awm dan an sawi dun a. Strait of Hormuz hawn reng a pawimawhzia pawh an sawi niin India-a US palai, Sergio Gor leh Modi-a ten X-ah an tar lang.
Tun hi February 28-a US leh Israel tang dunin Iran laka beihpui an thlak hnua hruaitu pahnihte an inbiakna hmasa ber a ni.
Modi-a chuan, “India chuan inbengdaih leh remna siam chu a hma thei ang bera siam a thlawp a. Strait of Hormuz chu inhawng, him leh thlen theiha awm reng tura enkawl chu khawvel pum tan a pawimawh hle a ni,” tiin X-ah hian a tar lang.
Buaina hian thlawhna hmanga zin atanga lawnga zin leh boruakalhthei inthawnna thlengin kil hrang hrang a tibuai a, India-in tuialhthei thlitfim loh a lak luh zinga 40% kalna kawng khar a nih avangin a buai phah hle a ni.
Modi-a hian Thawhtanni khan parliament-ah buaina hian India tan hriat lawk loh harsatna a thlen tih a sawi a, Indian economy bulpui erawh a nghet a, ram chuan sumdawnna leh energya harsatna karah tuialhthei, lei tihthatna leh lungalhthei a neih ngah tawk thu a sawi bawk.
White House thuneitu pawhin Trump-a leh Modi-a inbiak thu hi a puang tawh a; mahse, an thil sawi leh thutlukna an siam dan erawh a sawi lo thung.
Modi-a leh Trump-a’n phone-in buaina sawi dun
