Nilaini kha Prime Minister Narendra Modi-a’n thuneihna a chan kum 25-na a ni a, he ni puala hun a hmannaah auhla (slogan) thar neiin ‘Kan ti thei’ tih chu a hmang.
Modi-a hian Indira Gandhi Indoor Stadium, New Delhi-a thuneihna a chan puala inkhawmah hmachhawp lian tak tak pathum a sawi a, hengte hi ‘kan ti thei’ tiin a khar zel.
Kum 25 kal ta khan Modi-a hi Gujarat chief minister atan a vawi khat nan lak luh a ni a, October 7, 2001-a lak luh a nih hian Keshubhai Patel-a thlakin an state chief minister 14-na a ni.
Nilaini kha Modi-a tan hun chhinchhiahtlak a ni a, BJP leh amah thlawptute chuan he ni hi uar takin an lawm.
“Vawiin hian, ka zinkawmah he hun min thlentirtu mi inpe leh ka worker-puite zahna chibai ka buk a. Thiante u, vawiin hi hun hriat reng tur a ni ngawt lo va, kan chakna siam tharna tura kan inthun khahna ni a ni a. He ni hi kan thutiam kan nawn lehna, ‘Kan ti ang! Kan ti ang! kan tihna ni a ni,” a ti.
Modi-a hian hmachhawp hrang hrang eng emaw zat a sawi chhuak a. Heng zingah hian India chu kum 2047-a ram changkanga chantir te, economy tha pathuma tel te, mahni kea din te, thil siam chhuahna hmunpui nih te, Olympics Games thlen te, van thengrenga Indian kaitir te pawh a tel a. A hmachhawp a sawi zel hian mipuite chuan, “Kan ti dawn!” tiin an lo chhawn thin bawk.
Modi-a sorkarin thutiam thar leh intihchakna tura hma a lak mek lai hian mi thiamte chuan a hun tawn tawha a khirh lai ber a tawng mek niin an sawi ve thung.
July thlaa thalaite kaihhruaia nawrna avangin Dharmendra Pradhan-a chu union minister atangin a bân phah tawh a. Tunah hian electoral roll ennawn, special intensive revision (SIR) kaihhruaiah Chief Election Commissioner (CEC) Gyanesh Kumar-a chu kil hrang hrang atanga bâng tura nawr a ni leh mek bawk.
Cockroach Janta Party (CJP) leh Congress kaihhruai eptute chuan BJP chu CEC hmanga inthlan tichingpenah an puh.
Hetiang karah hian Modi-a chuan thuneihna a chan silver jubilee a lawm a, an party leh a thlawptute chu an la inringtawk a, eptute leh CJP chu kal dan hran an nih avangin hneh theih an inbeisei nia sawi a ni.
Modi-a’n thil tum lian a neih pathumte chu Indian economy chawi kan, van thengrenga mihring thawn leh Olympic Games thlente a ni.
India hi tunah economy lian parukna a ni mek a, pathumnaah kaipui a tum a. Kum 2014-a Modi-a prime minister a nih tirh khan 10-na a ni.
Modi-a thuneihin kum 25 tling, a auhla thar ‘kan ti thei’
