Modi-a’n Chinese FM hnenah ramri tihmuanawmzia tulzia hrilh

Modi-a’n Chinese FM hnenah ramri tihmuanawmzia tulzia hrilh
Prime Minister Narendra Modi-a chuan Chinese Foreign Minister Wang Yi-a nen Thawhlehnia an inkawmnaah ramri chu muanawm leh hahdam taka dah a pawimawhzia sawiin India chuan buaina chin felna turin ‘dik, chhan tha leh pawm ve ve theih’ zela thil kalpui a duh tih a hrilh.
India-China inkungkaihna hi nikuma an bul hnai leh khawvel puma muanna a awm theih nana inzah tawn taka an buaina tifel tura an indawr atangin a fel hret hret tih Modi-a chuan a sawi a. Kum li chhung Line of Actual Control (LAC)-a an inep tawh hnuah thawm reh zelin buai hnua a vawi khat nan China a tlawh hma lawkin a sawi a ni.
Modi-a hian October-a ramria sipai an dah ve vete an hnuhkir hnua a vawi khat nana India tlawhtu, Chinese Minister Wang-a hi a bia a. A hmain National Security Adviser Ajit Doval biain Thawhtanni khan External Affairs Minister S Jaishankar a be bawk.
“Foreign Minister Wang Yi-a ka hmu thei hi ka lawm a. Nikuma Kazan-a President Xi Jinping-a nen kan inbiak hnuah India-China inkar hian lehlam lehlamin ngaimawh an neih leh an duh dante inzah tawnsak avangin a that lam a pan zel a ni,” tiin Modi-a hian social media-ah a tar lang a. Nikuma LAC-a an intihbuai hnu ni hnih leka Chinese hruaitu nen an inbiakna pawh a sawi lang a ni.
“Tianjin-a SCO Summit-ah pawh inhmuh leh hlan ka nghakhlel a. India leh China inkar nghet, hma lam sawi lawk thei leh siam that theih inkungkaihna hian an hnaih bakah khawvel pum muanna leh thanna kawng thui tak a hril a ni,” a ti bawk.
Modi-a hian Xi-a’n Shanghai Cooperation Organisation (SCO) Summit-a tel tura a sawm avangin lawm thu a hrilh a, sawmna hi Wang-a’n a hlan nghe nghe a, lawm takin a pawm a. China-in SCO president nihna a chelh mek pawh a thlawp thu a sawi.
Wang-a pawhin Jaishankar-a leh Doval-a te a kawmna chungchang a tar lanah ‘thil lawkawm lam’ a awm zel thu a sawi.
Modi-a’n China a tlawh tur hi April-May, 2020-a LAC-a an sipaite an intihbuai hnua a tlawh hmasak berna tur niin kha buaina chhuak avang khan Asia ram lian pahnih inkar hian kum 1962-a ramria an indo hnua a chhiat lai ber a thleng.
Prime minister hi kum 2018 khan China-ah lo zin tawhin hei hi pangngai taka Xi-a nena an inkawmna hmasa ber a ni a, tun tumah hian SCO Summit-ah a tel dawn thung a ni.
Nikum khan Kazan-ah Modi leh Xi hi an lo inkawm tawh bawk a, hetah hian ramria an buainate chin fel tha tiin heta tang hian a tha hret hret a. Hemi hnuah hian Special Representative tia invuahin Doval-a leh Wang-a chu vawi hnih an inhmu tawh a. Jaishankar leh Defence Minister Rajnath Singh-a te pawhin China-a an chanvo ang chelhtute ve ve an be tawh bawk.
India-China inkarin that lam a pan mek lai hian New Delhi leh Washington inkarin hniam lam a pan hret ve thung a, Donald Trump-a sorkarin sumdawnna leh tariff policy thar a neih vang a ni ber.
Thla kaw liam ta chhunga India leh China inbiakna hian April thlaa Tibet-a Kailash Mansarovar Yatra chhunzawm lehna hringin India-in Chinese mite hnenah visa a pe leh tan bawk a. Kum 2020-a an tihtawp tawh, thlawhnaa inthlawhpawh pawh ruahmanna siam thar leh a ni bawk.