Modi-a’n India-a sorkar hotu lu ber ni rei ber record siam

Modi-a’n India-a sorkar hotu lu ber ni rei ber record siam
Prime Minister Narendra Modi-a chu Pathianni khan India-a sorkar hotu ber ni rei ber a ni ta a, Sikkim chief minister hlui, Pawan Kumar Chamling-a record siam, ni 8,930 chu a khum.
Modi hi sorkar hotu ber nihna ni 8,931 a chelh tling ta a, a hmasa berah Gujarat chief minister a ni a, tunah chuan prime minister a ni mek.
Modi-a hi October, 2001 atanga May, 2014 thleng khan chief minister a ni a, hemi hnu hian prime minister atan thlan tlin a ni a. Ram indan hnua piang zinga prime minister hmasa ber a ni bawk a, India-a prime minister thutthleng luah rei ber pathumna a ni mek a, Jawaharlal Nehru leh Indira Gandhi te hnuaiah a awm mek a. October, 2025 khan sorkar hotu lu ber a nih kum 25-na a lo thleng tawh a ni.
Modi-a’n a lehpelh tak, Chamling-a kha kum 1994 atanga 2019 thleng, kum 25 chhung zet an state sorkar hotu lu ber a lo ni tawh.
Pathumna hi Odisha chieg minister hlui, Naveen Patnaik-a awmin March 5, 2000 atanga June 12, 2024 thleng a chelh a, BJD hruaitu hi India rama chief minister hna chelh rei ber zinga mi a ni.
Union minister hlunte chuan Modi-a’n mellung thar a kai hi an fakin an lawmpui hlawm a. He thil hian ram dah hmasa ber sorkarna, mi retheite hamthatna leh khawvel pum huapa India dinhmun chawisang tura a inpekna a lantir tih an sawi hlawm.
Defence Minister Rajnath Singh-a chuan Modi-a zinkawng chu rinawmna, inpekna leh mipuite tana thawhrimna hahdam lohna nena chhinchhiah rawngbawlna chhunzawm zel a nih thu a sawi.
Home Minister Amit Shah-a chuan Modi-a’n kum sawm tam tak chhunga mipui rawngbawl hna a thawh tawhna chuan inthlak danglamna hun a lantir tih sawiin India hmasawnna kawng a siam tharnaah a lawm hle tih a sawi.
Union minister-te bakah JP Nadda, Piyush Goyal, Ashwini Vaishnaw leh BJP hruaitute pawhin hetiang zul hian an lawmpuina an hlan a, ‘Modi-a hunlai’ hian rorelna leh ram hmasawnna kawngah tehfung thar a siam niin an sawi hlawm.