Prime Minister Narendra Modi-a chuan Iranian President Dr. Masoud Pezeshkian-a biain Asia khawthlang lama boruak inmung mek a sawipui a. X-ah BJP hruaitu hian India-in he biala remna leh muanna a awm theih a duh a, chumi atan chuan a inhuam tih a hrilh nawn leh tih a tar lang.
“Iran President, Dr. Masoud Pezeshkian-a nen kan inbia a, he biala dinhmun pawi tak chungchang kan sawi dun a. Buaina a zual zel leh civil mi nunna chân bakah vantlang thil tihchhiat a nih chu a lawmawm lh thu kan sawi a ni,” tiin Modi-a hian X-ah a tar lang.
“Indian-te himna bakah bungrua leh energy phurh tihkhawtlai loh a tulna chu India ngaih pawimawh ber a la ni reng a. India-in remna leh muanna a awm theihna tura a inpekna sawi nawn leh a ni a, inbiakna leh palai intirh a phut bawk,” a ti bawk.
Ningani chawhma lamah khan Prime Minister Modi-a hian US leh Israel tangdunin Iran an beihna avanga khawvel puma tuialhthei harsatna thleng mek thlirin India chuan a energy mamawh lak theihna tur kawngah hma a la dawn tih a sawi bawk.
Delhi-a NXT Summit 2026-a thu a sawinaah Modi-a hian a sorkar chuan India chu energy-ah ‘mahni kea ding’ a nih theih nan a him chin zelah hma a la a, hei hian sum tam tak a hum dawn niin a sawi.
“Kum 2014 hma khan India hian hun khirh bika hman tur tuialhthei dah khawlna a nei tlem hle a, tunah chuan lian tak kan nei tawh,” tiin Modi-a chuan a sawi a, sorkar chuan buaina chhuak mek avanga a mipuiten harsatna an tawh loh nan a hma a la dawn tih a sawi bawk.
Modi-a’n Iranian President Dr. Pezeshkian bia
