Prime Minister Narendra Modi-a chuan Ningani khan Mallikarjun Kharge-a biain rang taka dam leh turin duhsakna a hlan a, Congress president hi a hma ni chiah khan pacemaker vuahsaka zai a ni.
Kum 83 mi, Kharge-a hi Thawhlehni khan MS Ramaiah Hospital, Bengaluru-ah dah luh niin a tukah zaia pacemaker hi vuah a ni.
Priyank Kharge chuan pa dinhmun hi a tha a, ngaihtuahawm a ni lo tih a sawi.
Prime Minister Modi-a chuan, “Pu Kharge-a ka bia a. A dinhmun ka zawt fiah a, rang danga dam turin duhsakna ka hlan,” tiin X-ah a tar lang a. “Tha taka a dam chhuaha rei tak a dam theih nan ka tawngtaipui a ni,” a ti.
Rajya Sabha-a Leader of Opposition Kharge-a hi damdawi in a luh chhan tak chu a khua a sik avang leh a ke na a tih vang a ni a. A fapa, Karnataka minister Priyank-a chuan, “Pacemaker vuah turin an lo ti a, ruahman angin thil tih zui a ni a, a dinhmun pawh a tha,” tiin X-ah a tar lang a. Duhsakna an dawnah lawm thu a sawi bawk.
Damdawi ina awm mah se Kharge-a hian politics-ah hmachhawp tam tak a nei a, hengte tih tunah rih chuan thulh a la awm hlawm lo va. Thawhlehni hian Kohima, Nagaland-a zina Naga Solidarity Park-a vantlang inkhawma hun hmang tur a ni a. Nagaland Pradesh Congress Committee chuan mi 10,000 tal an tel tur thu an sawi.
‘Safe Democracy, Safe Secularism & Safe Nagaland’ tih thupuia hman tur inkhawmah hian hna nei lo tam, mahni kutkawih eizawnna, sorkar inrelbawlna leh kawngpuia inkalpawhna chungchanga BJP kaihhruai sorkar chak lohna puan tum a ni.
Vantlang inkhawm bakah hian Kharge-a hian Congress Political Affairs Committee, Pro-Committee leh District Congress Committee (DCC)-a president theuhte kawm a tum bawk.
Party hruaitute chuan tun dinhmunah chuan Kharge-a hian harsatna a nei lo va, ngaihven viau a mamawh rih lo tih an sawi.
Modi-a’n pacemaker vuaha inzai Kharge-a a kan
