Modi-a’n UAE president bia, Asia khawthlang buaina sawi dun
Prime Minister Narendra Modi-a chuan Thawhlehni khan United Arab Emirates President Sheikh Mohamed bin Zayed Al Nahyan a kawm a. Hruaitu pahnihte hian Asia khawthlanga buaina sosang zel chungchang an sawi dun.
Prime minister hian Strait of Hormuz kaltlanga him leh zalen taka lawng veivah a tul thu a sawi a. UAE hruaitu hi Eid pualin chibai a buk bawk.
“Ka unaupa, HH Sheikh Mohamed bin Zayed Al Nahyan, UAE president nen kan inbia a, Eid chibai bukna ka hlan hmasa a. Asia khawthlanga tun dinhmun mek kan sawi dun a, UAE-in beih a tawha pawisawi lo nunna chân leh vantlang hmunhma tihchhiat chu India-in na taka a dem thu sawi nawn leh a ni,” tiin Modi chuan social media-ah a tar lang.
“Strait of Hormuz kaltlanga him leh zalen taka lawnga kal theih a pawimawhzia kan pawm ve ve a, he biala remna leh muanna a awm thuai theih nan kan thawkdun zel dawn a ni,” a ti bawk.
UAE laka beihna nasa tak tan a nih atanga ni eng emaw zat hnuah Prime Minister Modi-a hian UAE president hi a bia a, India chu Abu Dhabi lamah a tang tlat tih a hrilh.
Iran chuan Inrinni khan Israel leh US tangdun thlawhnaten beihpui an thlaknaa Iranian Supreme Leader Ali Khamenei-a leh sipai hruaitu sang telh an thihna phuba lakna atan Asia khawthlang ram eng emaw zat, US sipai hmunpui neite chu missile leh drone hmanga an beih a chhunzawm hnuah hruaitu pahnihte hi an bia a ni.
Indo atanga chawlhkar thum a liam hnuah pawh UAE khawpuite beih chhunzawm zel a ni a, mi pariat vel an thi tawh a ni.
Modi-a’n UAE president bia, Asia khawthlang buaina sawi dun
