Modric era a tawp fel ve ta em ni?

Modric era a tawp fel ve ta em ni?
Hriau bengah pawh a chhuihlut nalh nalh thei ang an tih fiamthu thin anga ball pass dik thei Real Madrid midfielder Luka Modric an chhawr tel ta lo emaw tih mai turin Inrinni zanah Croatia an hriam zo lo a, kum 38 mi hi a lo upa ve ta deuh em ni tih loh theih a ni lo!
Croatia captain Modric bakah kum 35 mi ni ve tawh Borussia Dortmund, VfL Wolfsburg, Inter Milan, Bayern Munich (loan) leh Tottenham Hotspur midfielder hlui Ivan Perisic pawhin an team tlawm tur a chhan zo bik lo.
Kum tam tak chhung ‘tiki-taka’ style an tih mai hmanga international football lo awp tawh Spain chuan muang fan dalha in pass kual neuh neuh hmanga lehlam pawl chhaihbuai leh goal thun kha kalsanin Inrinni zan Euro bul an tanna inkhelah rang vat, goal tinzawn nghal ut zawkin khelh dan style thar an rawn entir a, awlsam taka 3-0 hnehna changin Euro 2024 title hawn tumtute tana paltlang ngai an nih turzia an lantir!
Ningani khan news conference-ah Croatia coach Zlatko Dalic chuan tuna Spain team hi tunhma ai zawngin attacking area chhungah an rang zawk tih alo sawilawk tawh a, an tumpui coach sawi ang tak takin Croatia goal bulah Spaniard attacker-te an cherang takzet a, ven hman an ni lo a tih theih hial awm e!
Spain chakna goal thum hi first half chhunga lut vek niin, left-back leh left wing-back anga khel kawp ve ve thei Spanish defender Marc Cucurella ball petchhuah chuan midfield-ah Rodri a tinzawn a, ani hian Fabian Ruiz pein, he midfielder hian Croatian defender pel hlekin Alvaro Morata tan a chhawpsak a, Spain captain hian hmahruaina goal khungin, he mi hnu hian Croatia hi an insiamtha zo lo tluanchhuak.
Tarlan tawh angin, Spain hlawhtlin tawhnate kha ‘tiki-taka’ hmanga an hlawhchhuah vek a ni a; he style hmang hian kum 2008 leh 2012-ah Euro title an la a; kum 2010 khan South Africa ramah World Cup trophy an chawi bawk a; mahse, goal thun tuma nawr phat aia dawhthei taka in pass kual hrep hmanga innghah kha sawiseltu an awm ve reng a, tuntum Germany ram Euro-ah chuan an dan a rawn dang ta daih a ni.
Tuntum Spanish attack-ah hian Barca rawlthar Lamine Yamal bakah winger ve bawk Nico Williams-te’n goal khung lo mah se fak an hlawh.
An goal hmahruai luh atanga tuibur hmuam da vel a ni ang tih tur minute 32-naah Alvaro Morata goal tur siamsaktu Ruiz chuan Spain goal hnihna khungin, chawlhlawk dawnah Yamal chhawpsak atangin Carvajal chuan sithum faia an hmahruaina goal a thawh ve leh.
Spain rawlthar Yamal hian a tournament debut-ah phut zawk leh tit dei dui a nei lo a, goal khat a siamchhuah bakah hian scoresheet-ah a hming a nemkai teuh hle a, mahse, Spanish keeper Dominik Livakovic chuan a kut khingkhatin pui zetin a dansak hlauh a ni.
Olympiastadion Berlin-a Group B inkhelah hian Bruno Petkovic chuan Croatia tan minute 80-ah penalty a chhuih a, with Spain keeper Unai Simon chuan lo dansak mah se ball perlet kal zel chu goal-ah a chantir ta tho a, he goal hi pawmsak a ni lo thung a, a chhan pawh penalty a pet dawn laia a team-mate lamin dailuh thiang lo an lo luh vang a ni.
An zangnadawmna ve tur goal pawh an hloh leh tak avangin Zlatko Dalic-a game plan-in hna a thawk lo tih a hmuh thei a; Spain supporter-te aiin Croatian fans tam ngial zawk bawk mah se tantu ngah zawkna pawhin awmzia a nei pha lo a, Spain attacking play fing zet kha veteran Modric leh a thiante’n an chelh ngang lo a ni ber!
2018 World Cup finalist leh kum li liam leh ruala he tournament semi-finalist ni zui leh ngat thei Croatia hian mak takin European championship bikah hian knock out match-ah chak an la nei ngai lo a, kumin phei chu group stage pawh hi an pel zo lo mai ang tih turin bul an tan chhia
Nikum Nations League trophy an lakna kawngah Spain hian penalty hmangin Croatia hi an lo hneh tawh a, tuntum Euro-ah chiang zawkin Croats an sawp a, an bultanna inkhela chak ve bawk Italy nen an intum leh dawn a, Croatia-in Albania an hmachhawn thung ang.