Mizoram Public Service Commission hnuaia civil service combined examination hna lak tumnaah thil fel lo a awm nia an hriat avangin Commission chairman chu bang turin Mizo Zirlai Pawl Gen Hqrs chuan an phut tih an sawi a. MPSC civil service combined exam hnalak hnuhnung berah thil fel lo tam tak a awm ngei nia an hriat thu leh, exam paper thenkhatah correcting fluid hman a ni a, mark pek tawh sa thaichhiatna leh mark tihdanglamna hnuhma thahnem tak awm niin an sawi a. MPSC hnuaiah hetiang sulhnu mak tak tak a awm chu pawi an tiin, hetiang thil dik lo thleng hi MPSC chairman thiam loh liau liau a nih avangin, MPSC zahawmna humhim a nih zel theih nan leh thalai hna zawng mekten MPSC-ah rinna an nghah zel theih nan MPSC chairman chu bang tura an duh thu an auchhuahpui a.
Hemi chungchangah hian MPSC hotute chuan thuthar thehdarhtute hnenah dan dik loa tih tlin an awm loh thu leh an lak dan a rintlak tawk tih an sawi ve thung a. Hetiang thil a lo thlen takah chuan tunhmaa an lo chin vak loh, exam an kalpui dan chu mipui hriata sawi a ngai ta tih sawiin, written exam zawhna chhanna en dan (evaluation) phung leh correcting fluid hman a tulna laite an sawifiah a ni.
He thil thleng chungchang MPSC lamin an sawifiahna atang hian, a kaikuang ber nia lang ta chu exam chhanna lo endiktu expert rual mi zahnih chuang zinga evaluator-te hi an ni awm e. State pakhata hna sang ber ber latu Public Service Commission-in chhawrtlaka a ngaih expert rual an ni a, answer sheet chhungah mark pe lo tura hrilh vek an ni chunga, answer sheet thai hnawk ngai khawpa an awm tlat mai hi a vanduaithlak hle a, he thil hi a thleng fo thin nia sawi a la ni lehnghal a; an expert tawk lo a nih mai hmel.
Eng pawh ni se, hetianga thil thlen dan hai lan a ni ta hi, nakin zela a thatna tur zawkah ngaiin, MPSC lam pawhin tanlaknan hmang se, chinpawr tur awm lovin exam hi huaihawt a nih chuan ngaitha takin exam beituten an result an pawm thei dawn a ni.
Monitoring…
