Morales-a hoten Bolivian sorkar duh loh lantirnaah mi pali thi

Morales-a hoten Bolivian sorkar
duh loh lantirnaah mi pali thi
Bolivia-a president hlui, Evo Morales-a thlawptuten sorkar duh lohna an lantirnaa sorkar mite nen an innawrnaah mi pali an thi a, inthlan an hnaih mek karah boruak a lian chak hle.
Ningani khan Justice Minister Cesar Siles chuan mi pali an thih thu a sawi a, thenkhat chu silaia kah an ni tih a sawi a. Sorkar news agency chuan pathum hi police officer niin firefighter pakhat a tel tih an puang.
Sorkar duh lohna lantir hi Bolivia-a eibar a harsat lai leh August 17-a president inthlan turah Morales-a a ding thei dawn em tih a chian loh mek lai a ni.
Duh loh lantirna hi Morales-a thlawptu an thatna thingtlangah a nasa zual a. Trade union organiser thin, kum 2006 leh 2019 inkara president, Morales-a hi Bolivia ram leilung fa zinga president ni hmasa ber niin retheihna um botua ngaih a ni.
Hetih lai hian term thum a president chhung khan mi mal rorelna hawia che nasaa puhna a tam hle a. Kum 2016 khan an ram danpui siam thaa a zawna term li president a nih theihna tur chu vote laa paih a ni a, Morales-a hi court-ah a kal zui nghe nghe.
Court-ah hian hnehna changin kum 2019 inthlanah a ding leh a; mahse, vote tichingpena puhna nasa tak awmin an ram politics a buai phah a, amah pawh ram dangah a tlanchiat phah.
Tun hnaia Bolivian court-te chuan president hi term hnih chelh theih tih dan an neih chu an kengkawh thar leh a, Morales-a hi kum 2025 inthlanah a din theih hmel loh hle a. Amah hian a dikna chanvo bawhchhiatsakah puhin a thlawptuten kawng an dang a, sorkar mite nen nasa takin an innawr phah.
Sorkar duh lohna hi rorel lai, Morales-a kaihhruai thin, Movement Toward Socialism (MAS) party chhunga buaina a tipunlun zual a. Morales-a hian nikum khan a thawhpui thin, President Luis Arce-a nen eibar dinhmun leh Arce-a’n president nih nawn leh a tumna avangin an intithiam lo va, an party a chhuahsan phah.
“Heng civil mite hian duh lohna an lantir zel kan phal dawn lo. Paramilitary kan sawi ri mek a, ralthuam keng an ni a, heng mite hi na takin kan chhang let dawn,” tiin Justice Minister Siles chuan a sawi.
Tual chhung chanchinbute chuan duh lohna lantir nasat zualna, Llallagua-ah chuan tank tirh luh an ni tawh niin an tar lang.
Ningani khan Morales chuan social media-ah sorkar duh lohna lantir hi ‘sorkar kal dan duhkhawp lohna leh economy tichhe zawnga kal’ rah chhuah niin a tar lang.
Sorkar hian an kal dan an thlak lo a nih chuan an ram chu ‘a tlu chhe vek dawn’ niin a sawi bawk.
Bolivia-ah hian thil man a sang chak em em a, an pawisa hlutna a hniam em em a. Morales-a thlawptute chuan Arce-a sorkar chuan an rama thang duh tak thin, energy sector-ah hmasawnna hna a thawk miah lo niin an puh.