Morgan Wallen “I’m the Problem” kar 10 a No.1 ta

Morgan Wallen “I’m the Problem” kar 10 a No.1 ta
Morgan Wallen album “I’m the Problem” chu Billboard 200 (US albums) chart-ah a No.1 a, he chart-ah hian a zawn lovin kar 10 a No.1 tling ta. He album hi a tlangzarh hlimah, May thla tawp khan No.1-ah a debut a, kar riat chhung a zawnin a No.1 zui a, chutah kar hnih chhung No.1 atanga a tawlh hnuah kar kalta chart-ah khan rawn No.1 lehin, tunah a kar 10 nan a No.1 leh ta a ni. Hetihrual hian Renee Rapp leh $uicideBoy$ bakah Yeat te pawh top 10-ah an debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla a mal a hralhna atanga album tlukpui te belhkhawm thin a ni.
“I’m the Problem” hi 1,36,000 hralh lehin, chung zinga 1,31,000 chu streaming atanga album hralhna tlukpui (on-demand official stream maktaduai 172.27) niin, album tak tak hralh chu 4,000 a ni a, album-a hla a mal a hralhna atangin 1,000 a tling thei bawk.
Wallen hian he chart a No.1 kai thei album pathum a nei tawh a (a album hmasa One Thing at a Time leh Dangerous: The Double Album te nen), heng album pathum te chart-a an No.1 chhung belhkhawm hi kar 39 a tling ta a, Elton John nihrualin, mipa solo artist zingah he chart-a No.1 nih reiah palina a ni pha ta a, Elvis Presley (67), Garth Brooks (52) leh Michael Jackson (51) te chiah a pha lo. A nawlpui a lakah chuan The Beatles tlukpa tumah an la awm lo a, anni hi an album hrang hrang hmanga he chart-a an No.1 hun chhung belhkhawm kar 132 a tling a, No.1 album 19 an nei.
Wallen-a album pathum te hi chart-ah kar 10 chin an No.1 thei vek a, zaithiam zingah album pathum chin tal, kar 10 chin No.1 thei vek nei thei parukna a ni a, The Beatles leh Elvis Presley ten album pali kar 10 chin No.1 thei an ni a, Whitney Houston, The Kingston Trio, Taylor Swift leh Wallen ten pathum theuh an nei. Hetihrual hian Wallen chiah hi album pathum a zawna chart-a kar 10 chin tal No.1 pui thei vek awm chhun a la ni ve thung.
KPop Demon Hunters soundtrack chu 1,00,000 hralh lehin No.2-ah bawka la awm.
Renee Rapp album ‘BITE ME’ chu 64,000 hralhin No.3-ah a debut a, he chart-a top 10 kai thei album a neih vawi khatna a ni. He singer-songwriter-actress album thar hi 47,000 chu album tak tak hralhna niin, streaming atangin 17,000 (on-demand official stream maktaduai 21.85) a ni a, hla mal hralhna chu chhiar tham a ni lo. A hmaa he chart a Renee tawn san ber chu 2023-a a album ‘Snow Angel’ kha niin, No.44 a kai.
Hip-hop duo $uicideBoy$ album thar ‘THY KINGDOM COME’ pawh 57,000 hralhin No.4-ah a debut a, he chart-a an tawn san ber a la ni a, an top 10 album pangana a ni bawk. A hmaa an tawn san ber chu No.5 a ni. Tuna an album thar hralhna hi 34,000 chu streaming (on-demand official stream maktaduai 45.48) niin, album tak tak hralh chu 23,000 a ni a, hla mal hralhna chu chhiar tham a ni lo.
Justin Bieber ‘SWAG’ chu 44,000 aia tam deuh hralh lehin No.5-ah bawk a awm leh a, Alex Warren “You’ll Be Alright, Kid” chu 44,000 hralh lehin No.8 atangin No.6 a kai thar leh a, chart No.1 hlui Morgan Wallen “One Thing at a Time” chu 39,000 hralh lehin No.11 atangin No.7 a kai leh ta a, chart No.1 hlui bawk SZA ‘SOS’ pawh 36,000 hralh lehin No.12 atangin No.8 a kai thar leh ta bawk.
Yeat album thar ‘DANGEROUS SUMMER’ chu 34,000 hralhin No.9-ah a debut a, 18,000 chu streaming (on-demand official stream maktaduai 25.83) niin, album tak tak hralh chu 16,000 a ni a, hla mal hralhna chu chhiar tham a ni lo. Yeat hian top 10 kai thei album paruk a nei tling ta a ni.
Chart top 10 khartu chu No.1 hlui Sabrina Carpenter ‘Short n’ Sweet’ niin, 30,000 hralh lehin No.16 atangin No.10 a kai thar ve leh ta bawk.