Morgan Wallen ‘Last Night’ a la Hot ber

Morgan Wallen ‘Last Night’ a la Hot ber
Morgan Wallen hla hit ‘Last Night’ chu Billboard Hot 100 (singles) chart-ah a No.1 a, he chart-a kar kua a No.1-na a ni ta. Hetihrual hian Taylor Swift ‘Karma’ pawh No.27 atangin No.2-ah a invawrh thar leh ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Morgan Wallen ‘Last Night’ hian kar khat chhungin radio airplay-ah ngaithlatu maktaduai 66.3 a la nei thei a, stream maktaduai 32.8 leh sales 8,000 a la tling bawk a, hei hi a kar kua nan chart-ah a No.1 pui leh ta a ni.
He hla hi a vawi khat nan March thla khan chart-ah a No.1 a, Morgan Wallen hlaah chuan he chart-a No.1 kai thei hmasa ber a ni. Country Airplay chart-ah pawh kar nga a No.1 tawh a, Hot 100 leh Country Airplay chart-a a ruala No.1 thei hmasa ber a ni bawk.
Taylor Swift ‘Karma’ chu No.27 atangin No.2-ah a invawrh thar leh a, he hla hi nikum November khan No.9 te pawh lo kai tawh a, mahse, he hla hi May ni 26 khan Ice Spice nena remix an tlangzarh thar a, May ni 27-ah a music video an tichhuak bawk a, hei hian a tilar thar leh ta a ni. Hei bakah hian a hla hi MetLife Stadium, East Rutherford, New Jersey-a Eras Tour concert-ah Ice Spice nen hian an sa dun a, a remix hi live-a an perform-na hmasa ber niin, hei hian a hla hi a tilar thar leh ta bawk a ni.
Karma hian radio airplay-ah ngaithlatu maktaduai 38.4 neiin, stream maktaduai 22.5 leh sales 17,000 a tling a, hei hi No.27 atangin No.2-ah a invawrh kai pui leh ta a ni. Swift hian Hot 100 chart top 5-a lang thei hla 25 a nei tling ta a, top 5-a hla lang thei ngah lamah pangana a ni a, Drake (35), The Beatles (29), Madonna (28) leh Mariah Carey (27) te a hmaah an awm a, a hnunglamah Janet Jackson (24), Rihanna (24), Elvis Presley (21), Justin Bieber (20), Michael Jackson (20) leh Stevie Wonder (20) ten an dawt.
Hot 100 chart top 2-a hla lang thei ngah lamah Swift hi parukna niin, a hla 17 chu chart top 2-ah a lang thei a, chung zinga pakua chu No.1 kaiin, pariat chu No.2 a ni ve thung a, tihian The Beatles (23; No.1-ah 20, No.2-ah pahnih), Mariah Carey (23; No.1-ah 19, No.2-ah pali), Drake (20; No.1-ah 11, No.2-ah pakua); Rhanna (18; No.1-ah 14, No.2-ah pali), Madonna (18; No.1-ah 12, No.2-ah pahnih) te chiah a pha lo.
Chart No.1 hlui Miley Cyrus ‘Flowers’ chu No.2 atangin No.3-ah a tawlh a, he hla hi an tlangzarh atanga kar 20 chhung chu Hot 100 top three-ah a lang tawh a, hmeichhe zaithiam zingah he chart top three-a hla pakhat lanpui rei thei ber record a la ni a, a nawlpuiah pawh phak loh pakhat chiah a nei a, Harry Styles ‘As It Was’ kha niin, chart top three-1h kar 29 a awm thei a ni.
Lil Durk ‘All My Life’ featuring J.Cole chu No.7 atangin No.4 a kai thar leh a, Rema leh Selena Gomez ‘Calm Down’ chu No.4 atangin No.5-ah a tawlh a, chart No.1 hlui SZA ‘Kill Bill’ chu No.3 atangin No.6-ah a tawlh, Eslabon Armado leh Peso Pluma ‘Ella Baila Sola’ chu No.6 atangin No.7-ah a tawlh ta bawk.
Luke Combs-a’n Tracy Chapman hla ‘Fast Car’ a cover chu No.10 atangin No.8-ah a insawn a, Toosii ‘Fovarite Song’ chu No.5 atangin No.9-ah a tawlh a, Metro Boomin, The Weeknd leh 21 Savage “Creepin'” chu No.9 atangin No.10-ah a tawlh ta bawk.