Morgan Wallen & Tate McRae ‘What I Want’ Billboard Hot 100-ah a No.1

Morgan Wallen & Tate McRae ‘What I Want’ Billboard Hot 100-ah a No.1
Morgan Wallen leh Tate McRae te hla thar ‘What I Want’ chu Billboard Hot 100 (singles) chart No.1-ah a debut a, Wallen tan he chart-a No.1 kai thei hla pali a neihna niin, Tate McRae tan a pakhatna a ni ve thung. Tunkar chart top 3-ah Wallen hla vek langin, chart record a siam a, kum 66 kalta a Hot 100 chart an tih tan atanga vawiin thlengin he chart top 3-a tum khata country hla hlir lanpui vek thei hmasa ber a ni.
‘What I Want’ hi Morgan Wallen album thar, Billboard 200 (albums) chart No.1 a debut ‘I’m the Problem’ a hla niin, he album hi kumina kar khat chhunga US-a album hralh tam ber a la ni. Morgan Wallen hi chu chart No.1-ah a mikhual tawh lo hle a, McRae hian January 2024 khan a hla ‘Greedy’ chu chart No.3 kai puiin, hei hi he chart-a a tawnsan ber a la ni a, a album ‘So Close to What’ chu kuminah Billboard 200 chart-ah a No.1 pui tawh bawk.
‘I’m the Problem’ album a hla dang ‘Love Somebody’ chu Wallen hian nikum November thla khan Hot 100 chart No.1 a lo kaipui tawh a, Post Malone a feature-na ‘I Had Some Help’ chu nikum May thla khan No.1 kaiin, March 2023-ah a hla dang ‘Last Night’ chu a No.1 pui tawh bawk a, he hla phei hi chu kar 16 a No.1 thei hial a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘What I Want’ hi kar khat chhungin stream maktaduai 31.2, radio airplay ngaithlatu maktaduai 3.9 leh sales 2,000 tlingin, hei hi chart-ah a No.1 pui a, he chart-a hla No.1 kai thei 1,180-na niin, No.1 a debut thei 83-na a ni bawk. Chart No.1-a debut chu he chart-a a lan theihna hmasa bera chart No.1 ni nghal tihna a ni.
Morgan Wallen hla dang ‘Just in Case’ chu No.11 atangin No.2-ah a invawrh a, ‘I’m the Problem’ pawh No.6 atangin No.3 a kai thar le ta a, tihian chart top 3 chu Morgan Wallen hla vek an nih bakah “I’m the Problem” album a hla vek a ni bawk.
Wallen hian tunkar chart top 10-ah a hla dang pathum a la lanpui thei cheu a, “I Got Better” chu No.7-ah a debut a, ‘Superman’ chu No.16 atangin No.8-ah a invawrh a, chart No.1 hlui ‘Love Somebody’ chu No.18 atangin No.10-a a kai thar leh ta bawk.
Morgan Wallen hi country hla chauh record thin zingah Hot 100 chart top 10-a tum khata hla paruk chin nei thei hmasa ber a ni, Hot 100 chart top 10 a hla lang tawh zawng zawng chu 18 tling tawhin, country music chauh record thin zinga he chart top 10-a lang thei hla ngah ber a ni bawk.
Tunkar Hot 100 chart-ah hian Alex Warren ‘Ordinary’ chu No.2 atangin No.4-ah a tawlh a, chart-a kar 13 No.1 tawh Kendrick Lamar leh SZA ‘Luther’ chu No.1 atangin No.5-ah a tawlh a, chart No.1 hlui Lady Gaga leh Bruno Mars ‘Die With a Smile’ chu No.3 atangin No.6-ah a tawlh a, he chart-ah kar 19 No.1 ni thei Saboozey ‘A Bar Song (Tipsy)’ chu No.4 atangin No.9-ah a tawlh ta bawk.