Lemchan khawvela chawimawina sang berah khawvelin a neih Oscar Awards-a award dawng tur thlanna vote nei thei te chu Academy of Motion Picture Arts and Sciences member-te an ni a, he academy member thar tur hi sawmna an pe thin a, chutianga sawmna dawng thar mi 529 zingah chuan KPop Demon Hunters film a HUNtR/X tana aw thawhtu EJAE leh mihang hmeichhe zaithiam lar chak tak teyana taylor te pawh rimawi lam atangin an tel a, acting lam atangin Jacob Elordi leh Jeena Ortega te pawh an tel.
Academy member tura sawm thar zingah hian lemchan lam chauh ni lo, zaithiam leh hlaphuahthiam bakah executive, director leh producer lam te pawh an tel a, zaithiam leh lemchan lamah pawh inhmang tel Sara Bareilles pawh sawmna dawng zingah telin, Josh Gad, Julia Garner, Simu Liu, tig Notaro, Josh O’Connor, Anthony Ramos, Bill Skarsgård leh Jenny Slate te pawh an tel.
Kumina sawmna dawng zingah hian Oscar nominee lo ni tawh mi 95 an tel a, an zinga mi 21 chu Oscar dawng tawh an ni a, mi pathum chu Scientific & technical Award dawng tawh te an ni bawk.
Academy membership hi peng hrang hrang chi 19 a awm a, membership hi a dila dil chi a ni lo va, member ni tawh sa ten an sponsor a ngai a, chutah pawh sponsorship hi tlawptu eng emaw zat an awm a ngai bawk. Chuvangin academy member nih hi thil awlai lo tak a ni. Hetihrual hian Oscar nominee lo ni tawh chu sponsor-tu an neih kher a ngai lo a, automatic-in member ni tura sawmna dawng thei nghal an ni.
Candidate te chungchang hi a peng hrang hranga executive committee ten an review ve leh vek hnuah membership committee-in recommendation an neihte hi an review leh vek a, chumi nuah Board of Governors-ah final approval atan an chhawpchhuak leh thin a, chuta an pawm te chu member-ah lak luh an ni thin.
Kumina sawmna dawng zawng zawng hian membership an nei thei vek a nih chuan academy-ah hian member 11,319 an awm tawh dawn a, chung zinga 10,338 chu voting member an ni ang a, a vawi khat nan academy-ah hian voting member 10,000 aiin an tam dawn a ni.
Motion Picture Academy zawm tura sawm zingah EJAE a tel
