Mourinho chungah hremna lekkawh
Turkish referee-te deusawhna leh rin zawh lohna lam hawi Tawngkam a chhakchhuak Thin avangin Fenerbahce coach Jose Mourinho laka Istanbul club lian dang Galatasaray-in football thuneitu sang ber ber hnena complain an thehluh tur chungchang kha chhuak hmasa lama tarlan a ni tawh a, Ningani khan Turkish Football Federation (TFF) chuan Portuguese coach lar laka hremna an tichhuak a, a na angreng!
February 24, 2025, ThawhTanni khan Turkish top flight Super Lig-ah Fenerbahce leh Galatasaray hi goal awm loin Galatasaray khelmual Rams Park-ah an inhnehtawk a; Turkey khawpui Istanbul-a inkhel a zawh hnu press conference-ah Fenerbahce manager Mourinho hian mei nei zetin match official-te a sawisel leh a, TFF chuan match li chhung ngawt a naute inkhel mualsir aTanga vil thei lo tura an hrem bakah Turkish lira 1,617,000 (USD 44,000) zet chawi turin an hrem!
Istanbul derby boruak a len theih em avangin ThawhTanni inkhel kha club pahnih inthurual chuan tualchhung referee chhawr loa foreign referee-in ham se tiin ngenna an thehlut a, chu ngenna chu thuneitute’n pawmin Slovenian referee Slavko Vincic chuan inkhel a ham ta a, mahse, a puibawmtu match official dangte chu Turkish referee-te tho an ni.
Kha inkhelah khan Fenerbahce player chu penalty chawi ngei tura Galatasaray lamin an beisei laiin referee-in a ham lo a; inkhelh banah Mourinho hian referee inthlakna pindana a luh thu leh Turkish fourth official lo awm ve hnenah Istanbul derby kha foregner-in ham lo se an club tan chuan chhiatna a nih leh tur thu a hrilh tih a sawi a, TFF-in hremna an lekkawh chhan ‘comment’ tak hi tarlan ni lo mah se kha thu Mourinho sawichhuah kha ni tura tinzawn a ni.
Galatasaray lamin an hmelma lian Fenerbahce boss laka an lungawi loh thu puang zui nghalin, Turkey rama hna a thawh tirh phat aTangin Turkish referee-te elsen leh hmusit zawng, hmu tling lo ngawih ngawih zawngin Tawngkam a cheh awl lo niin an sawi a, an lungawi loh thu thuneitute hnena ziaka thlen ngei an tum thu an puang zui nghal.
Turkish Football Federation thuchhuah chuan kum 62-a upa Portuguese laka hremna an lekkawh chhan tarlangin, Turkish referee-te laka zahlohna leh palzutna Tawngkam a cheh vang leh anni dodal zawnga thu a sawi vang niin an sawi a, chu chuan Turkish football-ah rinhlelhna leh ngaihpawlhna, thil pangngai lo a thlen niin an puh bawk.
TFF hian Mourinho thusawi chu sports inkaihhruaina (ethics) kalh niin an sawi a, tharum thawh sawimawina leh fan-te laka tharum thawhna chawkchhuak thei ti hialin an sawi!
An head coach laka hremna tarchhuah a nih hnu lawkah Fenerbahce lam pawhin thuchhuah siam ve nghalin Mourinho thlavang an hauh a, a comment chu a tum Thelha ngaihkawih luih a nih thu leh tum reng vanga thil dang kawhtirah an puh ve bawk.
Chelsea, Manchester United leh Tottenham Hotspur manager hlui Mourinho hi a hma pawhin Turkish match official-te chungchang a sawi dan avangin hrem a lo ni tawh a, chumi Tuma hremna pawh chu pawisa chawi leh inkhel vil thei lo tura danbeh bawk hi a ni.
Mourinho chungah hremna lekkawh
