Lok Sabha MP nih tumin Mizoramah candidate paruk an awm dawn tih a lang tawh a, hming pekluh hun a tawp tep tawh avangin candidate mi dang an awm belh lo turah a ngaih theih.
Thawhtanni khan BJP-in an candidate tur an puang a, anni hi political party-ah chuan a puang hnuhnung ber an ni. A hmain party paliin an lo puang tawh.
A puang hmasa ber ZPM-in Richard Vanlalhmangaiha an candidate dawn a, PC party-in Rita Malsawmi, Congress party-in Lalbiakzama, MNF-in K Vanlalvena, BJP-in Vanlalhmuaka.
Party pangate hian party dang thawhpui an nei dawn lo a, an maltan theuh dawn.
PC party hi nikum lamah Election Commission of India-in recognised party an nihna a hlihsak a, registered party an ni mek. ZPM pawh registered party an ni a, party dang pathumte chu recognised party an ni.
Party pangate’n candidate an neih bakah Independent ticket-in Hriata Chhangte din a tum bawk a, ani hian Thawhlehni hian hming pekluh a tum tih thu dawn a ni. Hming hi Nilaini thlengin a pek theih.
Independent ticket-a din tum Hriata hian symbol atan footballer hman a tum; Election Commission-in hmarchhak state pariatah symbol atan football hman a remti lo a, footballer hman erawh a remti.
Hming pekluh hun a tawp tep a, mahse Lok Sabha MP tur thlan chungchang hi khawlai titi a la tling lo. Mipuiin an la ngaihven lem lo a, candidate-te leh party-te pawh an la campaign tak tak lo.
MP nih tum candidate paruk chiang tawh
