BJP kaihhruai sawrkar laipuiin India leh Myanmar inkara zalen taka inkalpawh theih chin awm, Free Movement Regime (FMR) tihtawp a tum chu an dodal tih Congress party chuan an sawi
MPCC thuchhuak chuan, Union Home minister Amit Shah-a’n India leh Myanmar ramri pinphui a ni ang, tia Free Movement Regime (FMR) tihtawp a nih tur thu a sawi chuan, nasa takin Zohnahthlak unaute nena kan inpawhna a tibuai hle dawn a, hei hi pawi an tiin an dodal zel dawn tih a sawi.
‘BJP hian Hindu lal ram din an tumna kal zelah zawiawiin hnam tenau leh sakhaw tlem zawkte fing takin min nekchep tial tial a ni tih kan hriatfiah a ngai a. Mipui pawhin kan hma lawka MP inthlan turah ngaihtuahna seng se kan duh a ni,’ a ti.
January 22-a Ram Temple hawn nia sawrkar laipui BJP kaihhruaiin half-holiday a a puang ringawt chu India danpui kalh a ni tih MPCC hian sawiin, ‘sakhaw thila sawrkar anga lawmna kalpui hi India danpui kalh a ni a. Lok Sabha inthlana Hindu vote hui tum vanga Ram Temple sak zawh loh hawn ngawt chu Hindu puithiam lawk ber berte pawh Hinduism kalh tiin an tel duh lo hial a ni,’ a ti.
Hemi kaihhnawiha Rahul Gandhi-a’n Bharat Jodo Nyay Yatra kalpui mek tibahlah zawnga BJP sawrkar chetna chu a dem hle tih a sawi bawk.
MPCC-in FMR a dodal
