MPF-in vote chhiar hun sawn ngen dawn

Mizoram People Forum chuan Mizoram inthlanpuia vote chhiar hun atana Pathianni ruat a ni chu a hun sawn turin Election Commission of India hnenah a ngen dawn.
Mizoram People Forum annual general meeting vawi 16-na chu Thawhlehni khan Aizawlah neih a ni. MPF Gen. Hqrs president RevDr C Chawnghmingliana kaihhruaia thukhawm hian Election Commission of India (ECI) in Mizoram Legislative Assembly inthlan vote chhiar ni atana a ruat Decmber 3 (Pathianni) chu Kristiante ni serh a nih avangin a hun sawn turin ECI-ah ngenna siam nise, an ti.
Resolution siamin, ECI-in Mizoram State Assembly inthlan hun atan 2023 November 7 a ruat a. Vote chhiar hun atan 2023 December 3 a ruat bawk a. Vote chhiar ni atan December 3 (Pathianni) ruat a ni hi MPF chuan tha a ti loa. Kristian state tih theih khawpa Mizote zaa za Kristian awmnaah hian Pathianni chu ni serh, Pathian kan biakna ni a nih avangin vote chhiar ni atana hman hi a remchang lo kan ti a. Chuvangin vote chhiar ni atan hian Inrinni (Saturday) leh Pathianni (Sunday) nilo, nidang ruat tha leh turin ECI ngen nise, an ti
Annual general meeting-ah hian general secretary Rev Lalramliana Pachuau chuan annual report a pe a, kum 2024- 2025 chhunga MPF budget Rs. 14,03,000 an pawm bawk.
Thupui pahnih – “MPF kalphung leh hmalak dan tur” tih Upa Lalramthanga ziak leh “Huapzo sawrkar kan mamawh” tih Rev K Lalrinmawia ziakte zirin an sawiho nghal a ni. Local Forum, Constituency Forum, District Forum leh Constituent member atangin aiawh an tel a ni.