September 19, Ningani khan RG Stadium-ah LZ Juice MPL 11 khelh chhunzawm a ni a, round 11-na khelh zawh a ni. Inkhel hmuhnawm takah Chanmari FC in SYS FC an hneh a. Chawnpui FC in Ramhlun Athletic FC an hneh ve bawk.
Hnehna nen CFC an kir
I League 3 an khelh vanga chau Chanmari FC hi MPL 11, round 10-naah an tlawm a, season kal meka a vawi khat nan an chak lo. Sihphir Venghlun FC lakah an tlawm hnuin round 11-naah hnehna nen an kir a, an khingpui SYS FC chu 4-1 in an hneh. CFC hian hmahruaitu Aizawl FC nen an inkar an tizim a, an chunga awm AFC hi point khatin an la phak lo.
Aizawl FC nen an inkar tizim tura chak mamawh Chanmari FC hian rawlthar team SYS FC lakah bul an tan tha a, Lalkhawpuimawia chuan minute 20-naah hmahruaina goal a thun. Khawpuimawia goal thun hmang hian goal dang a luh belh lawk thei lo. SYS FC tan Mesak Lalrinngheta chuan minute 45-naah goal thunin an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm leh zual a, Chanmari FC in goal thum ngawt an thun belh. Second half tan atanga miute hnihna lekah CFC tan hian Lalhmangaihsanga chuan hma an hruai nawn lehna goal a thun. Hma an hruai nawn leh hnuin an khel tha zui ta viau a, SYS in an chhang let thei tawh lo. Inrintawkna sang zawk nena inlan CFC tan hian Lalrinchhana Tochhawng leh J Lalruatsanga ten goal an thun belh leh a, nuamsa pangngai taka hnehna changin point thum an hmu leh ta a ni. He inkhelah hian Chanmari FC tana khel tha tak Lalhmangaihsanga chu ‘Kuriz man of the Match’ ah thlan a ni.
Season kal mekah tlawm nei lova kal tluang a, hmahruaitu ni reng Chanmari FC hian khelh11 atangin point 26 an hmu a, pahnihna an luah chhunzawm. MPL team thar ni chunga bul tan tha SYS FC erawh an che fuh lo chho zel ta thung a, khelh 11 atangin point 12 an hmu mek a, hma an sawn hleithei ta meuh lo.
Chawnpui FC an chak
MPL 11, round 11-naa inkhel hnuhnung berah champion hlui Chawnpui FC chuan Ramhlun Athletic FC an hmachhawn a, si hnih faia hnehna changin point thum an hmu a, palinaah an inhlangkai.
Chawnpui FC hian an chung chiaha awm Ramhlun Athletic FC lakah bul an tan tha a, a tawp an khar tha bawk. Inkhel tan atanga minute lina lekah C Ramnunpuia Chinzah chuan hmahruaina goal a thun a. Hun tawp dawdn tep minute 90+5-ah Zothansanga chuan an goal hnihna thunin an chakna a nemnghet a, point thum an hmu ta a ni.
Chawnpu FC hian khelh 11 atangin point 14 an hmu a, palinaah an inhlangkai. Ramhlun Athletic FC hian khelh 11 atangin point 11 an hmu a, hma an la sawn thei rih lo thung.
MPL 11 – Chanmari FC an chak leh ta
