Mizoram Premier League (MPL) khel tur zawnna hnuhnung; Play-off second leg chu November 6, Nilaini khan khelh zawh a ni a. Chawnpui FC hnehtu Kanan FC chu MPL 12 khel turin an tling.
Kanan FC hian an veng thenawm Chawnpui FC chu play-off thawh khatnaah 3-2 in an lo hneh tawh a. Play-off thawh hnihnaah vanneithlak takin a hneh nawn leh. Second leg-ah hian Kanan FC tan Lalremruata chuan chawlhlawk dawn hnaih minute 45+3-naah he inkhela goal awm chhun hi a thun a, an team hi hnehna hlu tak a chanpui. First leg-a an chakna nen Kanan FC hian si belhkhawmah 4-2 in hnehna an chang a, tualchhung club te inelna ngaihhlut hlawh ber MPL hmachhawn turin an tling zui ta a ni.
MPL 12 khel turin Lawngtlai club MLS an lo tling tawh a, Kanan FC an tling zui ve leh. MPL team hnih hrem an nih vangin hmunruak pahnih a awm thei dawn niin a lang a. Hei hi erawh chu engtia hnawhkhah tur nge ti a la chiang lo thung.
MPL 12 atan Kanan FC an tling
