Mizoram Football Association (MFA) te an dik leh an huaisen zarah MPL 11-ah Match fixing a awm ngei tih hriat chhuah a ni ta a. Match fixing a inhnamhnawih Club, Club oficial leh player te hrem an ni ta bawk. MPL 11-ah match fixing a awm vangin Mizote sum duh leh rinawm ta lo riau a ngaite kan awm a. Match fixing a awm vanga MPL pui ta riau leh lar ta riaua hriatna te a awm bawk a. Sum inthap (betting odds) chungchang hrim hrim-ah pawh kan hre thui lo tlang tih a lang thei bawk. MPL 11 match fixing leh a chheh vel kan bihchiang ang.
Sum inthap : Khawvela awm chhunga bo thei lo tur pakhat chu sum inthap (Betting odds) hi a ni. Sum inthap hi tihbo theih a nih loh vangin dan anga kalpui a ni a, sum veivir pawh awiawh loh khawpin a tam. Mizoram ah ngei pawh hian Ar insual tira sum thap thin eng emawzat an awm a. Football-ah pawh kan tan zawng ram leh club an inkhel changin thian leh thian pawh sum inthap chang kan nei thin. USA President 47-na atan Donald Trump thlan tlin a nih hma khan Donald Trump leh Kamala Haarris te inkarah khan tu nge chak zawk ang tih inrinsiak a, sum inthlap tam tak an awm. Betting odds-ah Donald Trump a sang fal hle tih youtuber tam takin an puang fo a nih nghe nghe kha. Khawi hmunah pawh, sum inthapna hi dan ang takin a awm.
Dang anga sum inthapna a awm a, chu lama inhnanhnawih tam tak an awm laiin imfiammi, club leh official te erawh sum inthapnaa tel phalsak an ni lo thung. Sum inthapna inhnanhmawih ru an manchhuah tak kan hriat thar lam ber chu Brenford leh England striker Ivan Toney a ni. Ani hi thla 8 chhung inelna hmachhawn thei lo turin hrem a ni. Toney hian Saudi Arabia club Al-Ahli-ah a khel tawh nghe nghe. Sum inthlap hi phal a ni a, sum inthapnaah player tel phalsak an ni lo tih kan hre ta phawt.
Match fixing : Sum inthap ngawt aiin match fixing hi a tenawm leh zual a, infiamna hmai a tibal leh zual. Match fixing hi duan lawk result nei tura inremna a, an inremna ang taka tihpuitlin ti ila hriat thiam a awlsam ang. Sum inthapna vang emaw, team pakhat zawkin a hlawkpui theih tur emaw, team pahnih ten an hlawkpui ve ve theih tur emaw team dangin an tawrh theih emaw a nih vangin match fixing hi a awm thei. Match fixing awm turin sum a ngai thei a, sum tel hauh lo, tawngkama inremna inremna chauh pawhin a awm thei. A chhan chu eng vang pawh nise match fixing hi a huatawm vek.
MPL 11 match fxing
Dan angin sum inthapna a awm a, chhan hrang hrang vangin match fixing a awm thei bawk. MPL 11-a match fixing hriatchhuah tak kha match fixing rau rauah pawh huatawm leh tenawm thuah hnih a ni. Team dang tlaktir emaw, tlin tir duh vanga match fixing pawh a tenawm tawh em em laiin, sum inthapna vanga match fixing thleng a ni tlat a.
Sum inthapnaah dan phal loh chunga player te an inrawlh vangin match fixing-a inhnamhnawihte khan football dan an bawhchhiah a. Football zahawmna leh thianghlimna an tibawrhbang bawk. Match fixing a inhnamhnawihten hremna an tuar hi an tuar awm reng tuar, an cho chhuah a ni. Sawi mawipui tur a awm lo. Match fixing a inhnamhnawih ve lo, chak tuma thapui chuah. Rim taka thawka thlantui far zawih zawiha khelte tan Ngulhnama vih ang maiin a na thei hial dawn. Mi dik lote vangin midik tam takte tuar kha a na in, an khawngaihthlak a sin.
Engtia awm thei nge
Sum inthapna lama inhnamhnawih thukte hi an changtlungin, sum pawh an nei viau zel. A bawiha tang nghet tawhte an ni a, mi dang pawt lut turin an zeihawi em em a. Midang pawt lut turin sum pawh an ui lo. Thlem dan pawh an thiam a, a tira sual anga lang miah lo angin tawktarh pawh an siam thiam em em!
MPL rawn luh khungtute hi a tirah chuan rinhlelh an har em em! A bikin hetiang mite hi club thar leh club harsa zawk anga langte an bawh duh viau bawk. Football club hnenah sporsor tur angin an inzuar a, sum lamah tawktarh tha tak an nei a, hamthatna dang nen. Chumi bakah chuan player pek tel an tiam thin bawk. Chu chu an inzawrh dan a ni a, club nen inremna mumal tak an ziak thlap thin bawk. Club tan chuan chutiang na na na chu thawhpui loh har tur tak an ni. Mizo tam tak tan chuan rinhlelh an harsa leh zual ngei ang. A dawngsawngtute rilru thianghlim viau mah se a rawn inzuara te chuan an sum hmuh let tur bak an lo ngaihtuah miah si lo a ni.
Tum lawk nei ru ran chunga rawn inzuarte hian sum inthap leh match fixing lama hman thiam sa player an nei a. Chung an sawi zawi tawh, an duh zawng hria, signal man chak tur player te chu an club sponsor tharte-ah an pe tel thin. Chung an player te chuan state-ah emaw season khat an khel a. Chumi hnuah league dangah an khel zui leh mai thin niin an sawi. MFA in dam chhung atan an hrem hnu lawkah Goa lamain dam chhung atan hrem an nei zui ve leh a, chung mite chu mi thuhmun an ni. Chu chuan hman thiam sa player, tirhkual thin an nei tih a tichiang thei awm e!
MPL 11 atangin tawngkam thar hriat tur a awm, chu chu ‘signal man’ tih hi a ni. Sum inthapna lamah sum a tam chinah khan an rin anga result thlentir a ngaih chin a lo awm ta a. Chung hunah chuan inkhel entute zingah ‘Signal man’ hi an awm ta thin a ni awm e! Chu singnal mantu chu player te hmuh ngei turin a awm a. Entir nan; Singal mantu khan a jacket jipper a zih pum te, zip lo a hak te, a jactket a’n pawh sawih kual dante khan awmzia a nei ta hle a. Signal mantu awn dan a zirin chumi zat chu goal chhuah tur, tun tum chu market a awm lo engthawl takin a khelh theih adt. tihte kha player ten an lo hrethiam ta mai thin a ni.
MPL hian entu eng emawzat a nei reng thin. Football tui tak takte phei chuan an en fo mai. MPL player te ngei ngei pawhin a hmunah en chang an nei, an en thiang bawk. A hmuna entute hi mi hrang hrang an nih thin vangin MFA tan pawh signal mantu kha hriat an har em em! ,Siganal man’ tihte hi a ngai a nih reng pawh a rinawm loh a. Entu mipuite hi hmun hrang hrangah an thu thin bawk si a, inelna buatsaihtu tan chuan Signal man hi hriat theih loh tluk a ni.
Kan rinawm loh vang a ni em?
Match fixing in mi tibuai ta mai hi Mizote an rinawm loh vang emaw, kan pianthar loh vang emaw a tirah chuan a ni ngawt bik lo. Player pakhat chuan a khel tha a, hmabak eng tak a neih vangin Rs. 70,000 pek bakah Gym tha taka kaltir an tum thu a sawi. Khelh that vanga cheng sing chuan bosus pek tum pawh an awm thin. Mi fing leh fimkhur, thil dawn thui deuh chuan chutiang chu hnar nachang an hria a, an him. Club thenkhat he lama bul tan, a dik lo a ni tih an hriat hnua an thawhdunna titawpte pawh an awm. Chu chuan kan rinawm loh ngawt vang emaw, kan pianthar loh vang ngawr ngawt emaw a ni lo tih a tichiang. Chutihlai chuan fimkhum thiam tawk lo, dawn thui lutuk bawk si lo erawh an awm. Chutiang mite chu an tum lawk hauh lovin an tlu lut a, talchhuah leh mai kha an harsat. Kawng lehlamah chuan hetiang mite hi an khawngaihthlak a sin. Chutihlai vek chuan, hetiang lam pawisa lo hrim hrim erawh an awm. Hman thiamsa player an awmte pawh kan tih kha.
Engvangin nge MPL
State dang leh ram dang atanga hma lakna vanga MPL-ah match fixing lo awm ta hi MPL ropui em vang emaw, lar tak em vang erawh a ni kher lo. Sum inthap mai pawh ni lo, match fixing lehzela inrawlh tur chuan league biru, publicity tha pangngai tak si, result pawh mumal taka tarlan thin ni ve si luhchilh an zuam zawk. MPL 11 a match fixing ang hi Champions League te, EPL te, Euro angahte thleng tura beisei ngam chi a ni lo. ISL ang tak ngialah pawh hian tih tum ngam chi a ni lo. Entu an tam a, chetsual hlek a pawi em em tawh. Tisual lui fo tur phei chuan a theih loh a ni deuh tawp mai. Hetihlai hian Mizoram ah chuan MPL hi a ropui ber, player tam tak an hlawhtling tawh, an la hlawhtling zel dawn bawk a, kan ngainep ta erawh tihna a ni lo. Kan tan a hlu, a ropui reng MPL hi.
An rawn luhkhung chhan lian tak chu he lamah hian tawnhriat kan la nei lova, a pawi theihzia, payer te hmakhua a tihchhiat nasat theihzia kan ngaihtuah thiam tawk lova, hmin kan la awl. An duh angin result mumal tak a awm a, publicity a tha em em tho bawk si a. Sual lama ngaihtuah duh tan chuan ‘siai tak ei’ tih tur a ni ve tlat a ni.
Match fixing a awm theih nana hma rawn latute hian result bak ngaihven an nei tak tak lo. An duh ber chu an duh anga result thlentir kha a ni mai. Chu pawh sum inthap a tam zual changin.
Engvangin nge MPL result chu an tan a pawimawh em em tih zawhna a awm leh ang. Inkhel tur an awmin sum inthapin chak tur zawk inrinsiakna a awm a. A ring diktu a hlawk lawih a, a ring dik lo zawkin a chan teuh thung. Rin lawk loh tak result a awm changin a ring diktu an hlawk leh zual viau thin bawk.
Thawhleh zan khan Champions League ah Sporting Lisbon leh Manchester City an inkhel a. An inkhelh hma khan Betting odds-ah chuan Manchester City in chak turin rin an kai zawk hle dawn a. Sporting CP chak ring erawh tlem te an ni ang. City kha lo chak ta se, City chak ringtute an hlawk em em dawn lo. Sporting chak ringtu tlemte erawh chuan an hlawkpui em em dawn thung. City lama thaptute sum kha an hui vek dawn miau vangin. Chutiang zel chuan MPL result pawh an tan khan a pawimawh ta a ni. Betting pangngaiah chuan a vannei tan hlawkna a ni a. MPL-h erawh kha chuan an rin anga thil a thlen nan match fixing an awmtir zui ta thin a, chu chu tenawm thuahhnih kan tih kha a ni.
MPL 11-ah a tha lo zawnga rawn che na takte hi khawi lam atanga lo kal nge, khawi lam chhingkual nge an tih hi hre chak kan tam ang. Khawia inbun nge tih pawh hre chak kan tam hle bawk ang. Betting Odds hi a inbun nghetin an inzar pharh nasa lutuk a, hmun tin an dapchhuak a ni deuh ber mai. A bul thum hriat tumin chhui dawn ta ila Chemtatrawta thawnthu ang deuh khan kan kual thui duh hle ang. State dang a awm a ni a. ram dang daih pawh an inrawlh thei tih pawm ila. Mizoram inbun an ni lo, hriat loh chhingkhual, mikhual tha lo tak te an ni e!
MFA chu fakin awm rawhse!
MPL 11 a thil duhawm lo tak rawn thlentirtute hian Mizote min zuam bik vang a ni lo a, hetiang thilah hian State hrang hrangte hi an him bik lo. Hei hi awih lo kan awm a nih pawhin MFA in hremna a tihchhuah hnua Goa lamin hremna an tichhuak zui leh khan a tichiang a, a ngemnghet. A nihna takah chuan State dang, league dangte hi an inhnamhnawih nasa zawk niin a lang. Inhnamhnawih an tam em vangte, a buatsaihtu lam kut lo fai tawk lote pawh an awm a ni mai thei, MFA angin an huaisen ve ngam lo va, MFA angin hma an la ve ngam lo.
Match fixing chungchangah MFA in hma an lak a, hremna an tihchhuak khan AIFF beng a thleng a, India football khawvel a nghawr nghing nghal dawt. MFA hmalakna hian Goa lamah pawh hlet a chhuah nghal var. An hmalakna vangin MFA hian fak an hlawh hle a, State hrang hrang atangin fakna thu mawi an dawng mawlh mawlh reng. Hun thim kan tawn laia MFA huaisen leh rintlak kan nei hian Football a Mizote hmakhaw enzia a tilang. MFA hian fak an phu thlawt. Fak nawn fo ang u.
Hun thim tak kan tawng mek tih hi zep thu a cheng lo, thup theih pawh a ni lo. Mah se, tunah hnualin, zakin inkaikun rih mahila kan tan hun tha, hun thiang a inherchhuak leh ang a. Inchhuang taka hawi pir vahin, lawm vangin sang takah kan kut kan phar chhuak leh ngei ang!
MPL match fixing leh a chheh vel
