Mizoram Public Service Commission (MPSC) chairman thar atana sawrkarin a ruat R Lalramnghaka chu Thawhtanni khan lakluh a ni.
Raj Bhavan Durbar Hall-a lakluh inkhawmah chief secretary Dr Renu Sharma chuan warrant of appointment a chhiar hmasa a. Larsap Dr Hari Babu Kambhampati chuan rinawmna thu tiamtirin MPSC chairman atan a lalut a ni.
Chief minister Lalduhoma, Assembly speaker Lalbiakzama, Home minister K Sapdanga leh minister thenkhat bakah MLA leh sawrkar hotu lute leh sawmbikte an tel a. Chief minister hlui Zoramthanga pawh a tel a ni.
MPSC chairman thar R Lalramnghaka hian B.Sc (Agri) degree a nei a. Kum 1991 khan Mizoram Civil Service a zawm a, kum 2009 khan Indian Administrative Service (IAS), AGMUT cadre-a hlankai a ni.
Mizoram sawrkar hnuaiah mawhphurhna hrang hrang a chelh tawh a, director, DC leh secretary hna te a chelh kual hnu ah MPSC chairman atana ruat a nih hma chiah hian General Administration Department leh Public Works Department secretary a ni.
1965 September 9-ah a piang a. A nu leh pa chu Kapdaia (L) leh Saikungi (L) te an ni. A nupui Vanlalliani leh a fate nen Aizawl Electric Vengah an cheng mek.
MPSC chairman thar lalut
