IBPS RRB hnuaia Mizoram Rural Bank-a thawk tur hnaruak lak chungchangah Mizo Students Union chuan Mizoram Rural Bank (MRB) Head office-ah general manager an kawm.
MSU Gen. Hqrs. hruaitute sawi danin, MRB hnaruakah hian officer scale-1 bikah scheduled tribe (ST) tan post a awm tlem thin hle a, kuminah phei chuan a awm lo hial a. Hei hi Central Reservation Policy-ah ST tan post a tlem vang a nih thu MRB hotute hian an lo sawi. MRB-ah Mizo thalai a tam thei ang ber kan luh theihna atan MSU chuan theihtawp a chhuah dawn tih sawiin, hemi chungchangah hian Ministry of Finance pawh MRB hotute nen dawr ho dan tur leh hma lak dan tur an sawi ho tih an sawi a ni.
MSU chuan hnamdang, Mizoram pawn atanga MRB-a thawk tura lokalte chu danin a phut angin Proficiency Languange Test an paltlang ngei em, tih a enfiah reng dawn tih a sawi a. Public sector unit hrang hranga thawkten dan anga Mizo tawng an thiam leh thiam loh exam buatsaihtu tur Board fel tak din a nih theihna’n hma lak an tum tih an sawi.
MRB-a Mizo thalai luh tam theih dan tur MSU-in sawipui
