MSCPCR Sainik School tlawh
Mizoram State Commission for Protection of Child Rights (MSCPCR) chuan Ningani khan Sainik School Chhingchhip chu hrilhlawk loin a tlawh a, a pumpuiin hma an lak danah lawmawm a ti.
MSCPCR hi an member pahnih – R Laltanpuia leh Darthakunga hoin an kal a. MSCPCR superintendent Lallianzuala Chawngthak leh State Child Rights coordinator C Lalduhawma ten an tawiawm.
Sainik School hostel, school building, Mess Room leh choka an endik a. Complaint box dah a nih leh nih loh, nu leh pate tana awlsam taka biakpawhna (helpline) a awm leh awm loh an en bakah danin a phut CCTV awm leh awm loh enfiah a ni.
A pumpuiah Sainik School hmalaknaah an lawm tih MSCPCR hian sawiin, block tina CCTV dah a ni chu lawmawm a tih rualin, floor thenkhata CCTV function mumal lo erawh siamtha thuai turin school thuneitute a ngen.
Tunhnaia an tar, anti-ragging /anti-bullying lam hawi poster an hmuhin lawmawm an tih thu an sawi a. La tar zawh lohte pawh tar chhunzawm turin an hrilh. MSCPCR-in hmasawna tura rawtna principal leh staff-te hnena a thlen chu hma lak mek a nih thu leh a rang thei ang bera hma an lak chhunzawm tur thu Commission member-te hi an hrilh a ni.
Sainik School Chhingchhip hi 2017 May 15-a din niin, class VI-XII zirna a awm a, seat 460 awmin 10% hi hmeichhe tan reserve a ni. Seat awm zawng zawng atang hian 60% hi Mizoram zirlaite tan hauh niin, 40% chu Mizoram state pawn tan a ni.
MSCPCR hian Mizorama zirna in hrang hrang chu naupang tan a him em tih leh naupangten an chanvo dik tak an dawng em, tih a endik thin a. Hei bakah hian zirtirtu leh zirlai atanga tihduhdahna a awm leh awm loh a en bawk.
MSCPCR Sainik School tlawh
