MSL 11 Finals – Zemabawk BC aiin Khatla TBL vannei:
Zanin Game -2, mipui tam ber tum tur!
Mizoram Super League (MSL) 11 finals game 1 zet chu khawi hmun atanga en tan pawh hmuh a nuamin a hmuhnawm hle. Inkhelh hun chhung pangai minute 40 ah an inhnehtawk a, hun pek belh (over time) minute 5 khelh a tul leh a, hun a tawp meuh chuan Khatla TBL in Zemabawk BC lakah 87 – 84 in vanneihna an chang.
Khelmual luh hma chhehvel
Zemabawk BC in fans an ngah leh pek hle a, an thawm chu beng hup pawhin a la ring hret thei hial – chak tumin rawl an chhuah a, an tumpuite au zam tham stadium chhungah an tlim hmur!
MSL 11 bika supporter nei tha ber lawrlak an nihna a nemnghet nawn. Heti taka fans an ngah chhanah hian Aizawl daia veng satliah anga lo kawktute hnenah Aizawl City an hmuh laia awp tum ngei khawpin veng inlungrual an nihna an phochhuak! An veng pawn mipuite tan lah a tanawm thei tur khawpa an club puipate an inngaihtlawm rah malsawmin a awm bawk!
Khatla TBL tantute an tlem zawk nang a, an fuankhawm thahnem leh ngang mai! Khati zat an fans zingah khan Khatla TBL star player a chhal loh phal loh Hmangaihzuala (Miller-) kiangah a pa Pu Matluangtea kha kil khatah lansarh duh lo zetin awm mah se The Aizawl Post Hoops Mania mitin a hmu leh chat.
Ani hian a fapa inkhel hi a en satliah ngai lo, pa in fapa a hmangaihna thuk zia tihlanin a awm fo tawh a, a fapa tan hian hun a neih phawt chuan eng tournament-ah pawh rawl chhuah meuhin a au thin – pa tam takin fate aia ngaihven leh ngaihsak kan nei thin ang hi a ni ve tlat lo, chhuanawm tak a ni. MSL 11 hian chhungkaw inhmangaihna nghawr chhuak ngei se.
All is fair… What?
MSL 11 finals tan a ni a, dan hnuaia chhawpchhuah theih zawng zawng thehchhuahin a awm a, thlirtute mit a vannei leh pek ngang mai.
Heti hian a tawi zawngin sawi dawn ang. Inkhel nghawng danglam lawih thei khawpin Khatla TBL captain Thazualan (21 pts) 2nd quarter-ah 3 pts a sur tir a; ani hi ZBBC player fei Tyson-an 2nd half-ah a kut hmui lutuk a um ro thak!
Mahse, class is permanent tih kha a ni miau a, TBL captain hian basket nei tam zui lo mah se a teammate tan erawh a tangkai tawp thak.
R. Dengthuama Indoor Stadium-ah ZBBC leh TBL te danglamna langsar em em chu an tualchhung tlangvalte an inkhelh that hleih hle. Hei hian match result a nghawng zui.
ZBBC tan Ropuian (18 pts/ 6 assist) MVP nih phu khawpa a khelh that laiin Lma (6 pts/30 mins) leh Thianga (6 pts/25 mins.) erawhin beisei an pha lo, game 2 -ah an thawhchhuah ran a ngai ang!
ZBBC lam hian an captain Rinawma (8 pts) hi team phuarkhawmtu a ni tih an theihnghilh loh a fuh bawk ang – Ropuia, Rinawma leh Tyson-a te anga fim taka a suala sual ngam an mamawh takzet.
Heng karah hian TBL tualchhung star player pahnih Emmanuela-a (20 pts) leh Miller-a (5 pts/9 rebounds) te an hriamin champion tum khawpin court chhungah an tal hnawk ngam!
Hlutea (5 pts/4 rebounds) lahin a minute 10 chan chhun a chhawr tangkai nasa bawk si a, Lsa (7 pts/6 rebounds) pawhin minute 12 lek chhungin vawi duai lo a hming lam nawnna tur tham khawpin a khel tha bawk!
Hnam dang player-te khaikhin ila
Player of the match a thlan tak Khatla TBL super star Mitchell (22 pts/11 rebounds) tharum leh thahrui dang chat hlei thei ZBBC lamin an nei meuh lo.
Khatla TBL inter state player pahnih Palpreet (1 pt) leh Amjoy Shingh (4 pts) te erawh an che a muang ruih a; ZBBC lam hnam dang player Tomar (21 pts), Shashank (3 pts) leh James Snyder (19 pts) te erawh ngaihthatpui tham khawpin offense lamah an khel thei a, anni pathum hian ZBBC defense pawp an hnawhphui theih chuan game 2 ah game 1 ang bawkin chak zawk thei tur an ni.
MSL 11 Finals – Zemabawk BC aiin Khatla TBL vannei: Zanin Game -2, mipui tam ber \um tur!
