MSL 11 – Khatla TBL champion
Mipuite tan rawn Zemabawk BC an liam!
April ni 9, 2026 zan khan Mizoram Super League (MSL) 11 finals game 2 khelh a ni a, MSL tum thum champion tawh Khatla TBL chuan Zemabawk BC chu 89 – 68 a hnehin MSL 11 ah an champion.
Finals game 1 lamah chak theihna hun tha ZBBC lamin an neih an bawhchhiat an tuar a, game 2-ah hian an khelh that ber tum a lo ni lo zui bawk nen ZBBC tan hian thawnthu danglam leh ngaihnawm zet an rawn phochhuah chu mittui nen khar a ngai ta!
Champion zawk ta Khatla TBL erawhin MSL 5 tih lohah kha chuan MSL finals hi la lut kim vek thei khawpa tum 10 finals an lo khelh tawh an chhawr tangkai a, zam eih lovin an tawnhriat rah an seng a, an champion zui.
Finals game 2 thlir thuak ila
Inkhel tan phat a ni a, ZBBC thiampuipa Ropuian a ball chuh nat thin zan danga tangkai em em thin kha a chhiatpui a, inkhelhna tualzawl atanga lakchhuah ngai khawpin foul vawi 3 zet a neih zawn thut chu a team ten an tuar hle!
Tarlan tak angin tawnhriat nei tam zawk Khatla TBL hian an captain Vanlalthazuala (25 pts/36 mins) hovin ZBBC thiampuipa inlan lo hi an hrem zui ngahl char char a, an inter state player Palpreet Singh meuh pawhin point 16 a nei hial!
TBL star player Emmanuel-a (17 pts/39 mins) lah a hah thei lo emaw tih tur khawpin a khel chhuak tha. Game 1 lama player of the match lawmman la tu Mitchel (15 pts) a hnawk leh fu!
ZBBC lamin an head coach Sangpuia tan bul an tan fuh loh avangin hna a khirh hle a, in siam that nana hun tha a neih a hmang tangkai tawk lo zui bawkin a hriat theih.
A player hman thiam Lma leh an captain Rinawma ten offense lamah an thlawp tha tawk lo va, heng karah erawh hian Thianga (14 pts/5 rebounds/31 mins) a khel tha takzet thung.
P. Tomar (20 pts), Carl Snyder (8pts) leh Shashank (5 pts) te pawhin chak thei tur khawpin an khel tha tawk lo fai vek!
A tawpah chuan Khatla TBL
An asst. coach Richard-an team te an head coach Mapuia’n a phuarkhawm that zia hi a lo sawi tawh a, ani ho hian a tum li nan champion nomawi an chawi ta nge nge hi an phu thlawt.
Tun inelna ah hian Khatla TBL hian an 1st match ah kim lo nuai chungin Saron BC an hneh lo tih loh chu an chak fai vek a, heng an chak theihna tur hian an tualchhung star player tha chungchuang |hazuala leh Emmanuel-a bakah hian Lsa, Miller leh Hlutea te an khelh that hi an team champion theihna tura a laimu pawimawh ber a tih theih.
An hnam dang player-te hian theihna nei sang hle mah se, champion tur khawpa tangkai leh khel tha erawh an ni reng hauh lo – Mitchel phei chu hliam te nauin a tlakbuak avangin league round lamah a hriam tawk lo hle!
Heng karah erawh hian Mizo player an neih te an head coach Mapuia hian a hman ngam vek rah an tel!
Mipui ngainat leh ngaihzawn rawn
Zemabawk BC
Anni hi Zarkawt BCA leh Khatla TBL ten MSL an thunun hneh em em karah MSL X ah a tumkhat nan an rawn inlan a, semi finals an lut pha nghal!
MSL 11 a inherchhuak a, club lian pahnih khing tawk leh hneh a lehthal thei tur khawpa an rawn khelh chhuah that avangin mipuite tan rawn an hlawh em em a, an vengchhung mipuite tawiawm na leh social media lama thlawptu an neih deuh deuh avangin MSL 11-ah hian ‘the peolpe’s champion’ niin, champion nomawi chawi lo mah se fans an neih that hi season thara an club phurna belhchhahtu tur an ni.
ZBBC hian foreign player an lalut fuh tawk lovin a lang a, MSL history thlirin palian leh thahrui ngah bakah defence lama tangkai hi an tlo tlat – Carl hi chutianga khel chi chu a ni lo tlat!
Khaikhawm dawn ila
He team hian MSL chuai leh uai lam tawh an rawn kaitho a, hei tak hi Mizoram basketball-in ke a pen leh zelna tura a mamawh chu a ni.
MSL 11 – Khatla TBL champion Mipuite \an rawn Zemabawk BC an liam!
