MSL 11 : MBBA-in vil hneh!
Club intluktlang tawk karah TKS…
Mizoram Basketball League (MBBA) buatsaih Mizoram Super League (MSL) kar hmasa ber khar a ni a – he inelna buatsaihtu lam MBBA puipa lamin a hmunah an vil hneh takzet.
Tuikual South BC an chuai!
Chiang zawka MSL 11 zir chiang tan erawh TKS tualchhung tlangvalte hian hnam dang player khelhpui tur nei lo mah se, an huaisen thlawt tih an lantir.
Stats. lam chauh en tan erawh inkhel an thlir tel loh avangin TKS dinhmun dik tak hi an hre kher lovang. An captain Akima hovin rising star Chawnga, Zuala leh Dinga te hi club dang tan chiltiputtu tur an ni.
Mission Veng Hotshots-in
club lian ngam!
He team hian TKS lakah point 100 chuang an score thei a; big 4 club zinga mi Zemabawk BC an lehthal zui hnuah Chanmari BC point khatin an hneh lo – an coach Ahruaia hian Johnson bakah khel tha chungchuang Ruatkima leh Afaka te nen MSL a inhamtang tum satliah lovin semi finals kai an tum ngam tih a chiang.
King of MSL Zarkawt BCA tluang
MSL X ah khan a zawna tum hnih chak lovin bul an tan a, MSL 11 ah erawh tum hnih chakin bul an tan thung – an tluang hle. Head coach K-a tan a tualchhung tlangval super trio Zonuna, R-a leh Matthew Sailo an inhliam loh a pawimawh ang. Chanmari BC lakah points 104 an score thei – an nawr na thawkhat tih a hriat!
Chanmari BC, Khatla TBL leh Zemabawk BC bul tan tha lo
Big 4 club zingah Zarkawt BCA an khel tha fal a; Chanmari lam hi an defense pawp huau hi an hnawhphui a ngai – an coach pahnih Lana leh Reuben-a ten kha ti tak maia Hotshots in an thiat thei kha chak mah se hna an nei tlat!
Damlo ngah Khatla TBL an dam chho tan a, Saron BC an hneh lo ngawt mai kha a pawi thei tih an hria a, an captain |hazuala hovin Chhinga Veng lakah an theihna an lantir tawh – MSL X finals game 3 ah khan chet sual khut pawi theih zia an hmu tawh a, an fimkhur tih a hriat.
Zemabawk BC hi champion-pui tham player nei siin MSL 11 ah an la khel ṭha tawk lo hle – 2 lost hi a tichiangtu a ni! Sangpuia enkawl team hi an khelhpui tawh pahnih BCA leh Hotshots laka chak lo ni mah se, an that dan bera an inremkhawm fuh vaih chuan dan harsa tur ber team erawh an ni – a chiang!
Saron leh an thenawm Chhinga Veng hriatthiam har!
Saron BC an par vul – TBL hnehin bul an tan a, TKS an chhu chau zui! Ngaihtha ngawt ngam tur erawh an ni lo – damlo TBL leh tualchhung tlangval hlang TKS an hneh te hi an ni. An head coach Marc Sailo a ngawi tam ta – hmui aiin thluak a hmang nasa tih a hriat.
Beiseiawm Chhinga Veng enkawltu Afela hian a foreign player tel lovin big 4 club zinga pahnih Chanmari BC leh Khatla TBL a ngam lo hle. TKS sawp zui mah se, semi finals lamliana inher lut turin an hmachhawn tur hi an la hrawl fu. Zorina, Chhuanawma leh Hriata te thlawp turin an hnam dang player-te an chet that hle a ngai ang.
Hoops Mania Timeout
MSL 11 match 10 khelh a ni tawh a, player of the match a hnuaia mi te hian lawmman an dawng tawh.
Player of the match hi Rozama te unau hian an dawng thei a, Zonuna leh Ruatkima hian tum hnih zet an la thei bawk.
MSL 11 : MBBA-in vil hneh! Club intluktlang tawk karah TKS.
