Nilai zana Mizoram Super League khelhah champion lai Khatla TBL chuan Venghlui VR4 an hneh a. Inkhel dangah Bungkawn LB Associates in Champhai Basketball Club an hneh bawk.
Khatla TBL leh Venghlui VR4 te hian quarter hmasa ber atangin inkhel hmuhnawm an lantir nghal a, TBL in point 39 zet an thawhchhuah nghal laiin, VR4 in point 30 an thawkchhuak ve bawk. Quarter hnihnaah erawh an indang chat tawn a, point an thawkchhuak pup pup tawh lo. Point an luh hleitheih lohna quarter ah hian point khatin TBL an chungnung hram a, point 10 a hmahruai chungin chawlhlawk an hmang.
Chawlhlawk hnu lamah VR4 in bul an tan tha a, quarter thumnaah point 6 in an chungnung zawk. Quarter hnuhnung berah inkhel a hmuhnawm zui leh viau a, point an thawkchhuak tam dun leh hle. Quarter hnuhnung berah hian TBL in point 39 an thawkchhuak a, VR4 in point 33 an thawkchhuak ve bawk. Inkhel en manhla takah champion lai Khatla TBL in point 124-116 in hnehna an chang zui ta a ni.
VR4 lakah TBL tan hian Joshua Aaron Keys chuan point 38 lai a thawkchhuak a, a chetha hle. Venghlui VR4 tana point thawkchhuak hnem ber Lalawmpuia chuan point 23 a thawkchhuak.
Nilai zana inkhel dangah Khatla Bungkawn LB Associates chuan point 84-66 in an khingpui Champhai Basketball Club an hneh.
Bungkawn LB A hian Champhai BC lakah an khel tha viau a, quarter hmasa ber atanga quarter hnuhnung ber thlengin quarter tinah chungnung zawk a ni vek a, phu takin hnehna an chang. Bungkawng LB A tan hian Gregory Lee Hacstall chuan point 46 zet a thawkchhuak a, a chetha fal hle. A point thawhchuah hi an team in point an thawhchhuah zawng zawng zatve aia tam a ni hial. Champhai BC tan chetha fal an awm lova, an khel tha rual a ni ber mai. Champhai tana point thawkchhuak hnem ber Lalropuia chuan point 16 a thawkchhuak.
MSL 9 – Champion lai Khatla TBL an chak
![](https://theaizawlpost.org/wp-content/uploads/Clipboard01-106.jpg)