MSL X finals: Zarkawt BCA zam lo!!
Jersey no ‘zero’ Zonuna ‘hero’ zan
Sharda MSL X finals game 2 April ni 25, zirtawpni zanah khan R. Dengthuama Indoor Stadium-ah mipui an fuankhawm a, game 1 lama chak tawh Khatla TBL in champion nomawi awlsam taka chawi mai tura ngaitu te ngaihdan hnawlin, Zarkawt BCA in 83-77 in hnehna an chang.
Player of the match atan Ramthar tlangval Zonunsanga chu thlan a ni.
Inkhelh hma boruak
Kum 1984, Oct. ni 26 khan Michael Jordan-a debut game ticket chu kum 2022 khan dollar maktaduai chanve dawnin lilamna (auction) hmunah hralh a ni. Inkhelh hma hauhin a chhehvel thil thleng hi a ngaihnawm thin hle.
MSL X finals game 2, court side pawh hi ticket hralh zawh (sold out) thu zirtawpni chawhma ah hriat a ni a, infiamna khawvela rim leh hah taka inbuatsaih thin ten hlut an hlawh hmuh hian an phu thlawt! Inkhel ticket a hmuna mi chang tur pawhin thui tak intlar a ngai – MSL X a nung hlarh hlarh hle.
Kan hnampui tualchhung tlang-valten inkhel hmuhnawm an chhawpchhuak a, a pawlh hmuhnawm zual tura hnam dang inlan thin te inkhel pawh a bawn – game 3 ticket ngaihven rang chi.
Mama i kut kha dah thla teh
4th qtr. minute 8:41 a ni a, Khatla TBL player SP Singh-an Zarkawt BCA point guard Zonuna tih thinrim ngei tumin a ban lek chhuak meuhin a pan a – BCA captain cool lutuk tak mai Matthew Sailo meuh pawh a alh phat a, buaina sang zawk a chhuah hma in chinfel nghal thuai a ni.
Match official lamin tan lam nei tana hrem phutna rawl an chhuah karah thutlukna lai takin an siam a, hremna lekkawh a ni lo!
Hei hi MSL X a ni!
Mizo player buaina tul lova siam an awm loh laiin hnam dang player thinchhe zet club tinah an inphum vek. A leilung fate zawk entawn an phu takzet a, match official lamin inkhel an enkawlna kawngah dan rualkhai takin an lekkhawng kawh a tul!
Technical problem avanga inkhel khaihlak fo mai hi inbuatsaihna pachhiat vang nge, khawi lai ber nge kawh tur ni ta ang? Finals game 3 ah hi chuan nawi nak bo teh se!
Inkhel thlir thuak ang
Khatla TBL an that dan berin an rawn inrem a, anni lam hi kut hmui em em, an captain |hazuala (26 pts) kaihhruaina hnuaiah hian tualchhung tlangval ho an dam dup vek a – amah |hazuala tak hi hotu tha tak a ni a, an inter state player pahnih hi court chhungah an thinchhiat deuh avangin vil tel a ngai hi a hna a hautak det!
Game boruak sangah |hazuala a tha zual. MSL X a player hmuhnawm ber pakhat, Emmanuel VL. Awmpuia’n point 19 a nei a, 3 pts erawh tum thum chauh a nei – an captain nen hian an indip dal deuh em aw tih theih chang a awm ta tlat!
Vawi 25 zet 3 pts anni pahnih hian an an thlawh chhuahah vawi 9 chiah an lut a – coach tha Mapuian siksawi a neih a rinawm.
American player James-a (19 pts) khel tha tawk lo, tum danga a luh thin tam tak BCA player pa sang Patel-a hma ah a tim tih a lang.
Langsar vut si lovah Thianga, Dede-a leh Lsa ten team game khelin, statistics lamin an rilru a luah lo tih a hriat. Khatla TBL hian hetiang player hi an mamawh a, an nei bawk.
Zarkawt BCA in ngaihtuahna thar an seng a, inkhel bul tantu first five thlakin Cunningham aiah Gujarat pa sang Sahaj Patel, fit 6’10 zet theihna tarlanin a awm a, point 15 neiin tum 8 zet block a nei – minute 34:24 a khel ta hem
Patel-a hi player vanduai tak a ni a, MSL 6, 8 leh 10 ah te khel tawhin foreign player hah chhawktu lekah hman thin a ni a, player tangkai thup bo a lo ni thin tih amah ngeiin a fiah.
Hmanraw tha Zarkawt BCA in an nei a, coach Marc Sailo a harh tlai – a risk fuh thung!
Zarkawt BCA team phuarkhawmtu, Ramthar tlangval Zonuna hi ball semtu a ni satliah lo, BCA inkhel khaidingtu a ni a – a thatna leh chakna, BCA game laimu tih hria an elpui ten a thluaka thinrimna tuh an tum a ni ziah.
MSL X ah erawh Zonuna zaidam, khaih, Zonuna puitlinna kan hmu ta – a jersey lei dil tum an awm thu a ri e.
R-a, Justin leh Matthew Sailo te khelh that zan hian Khatla South tlangval Hmachhuana first five ah a rawn inlan bawk a, he nau hian mamawh a nei – a defense hi tang zual se, khawi hmun atang pawha score thaih thaih thei hi Zarkawt BCA star player ni phak thei a ni chiang.
Coach pahnih thluak tha kan hmu a, hun tawp hnaih lama BCA game nawi lek lek chinfel theih anga lang lakah erawh coach in time out a la lo va, inkhel result a inthlak tep.
TBL coach Mapuia pawhin a bench player a ring ngam tawk lo tih a hriat, a player panga zet a thut tluan tir!
Hoops Mania Time Out
Kan lo chik a, kan lo thlir a – inkhelh tan hmaa khuallian Sports minister Pu Tetea Hmar in thu a sawi rei lo va, inkhel mipui nghahhlelh en kha kan pungkhawm chhan tih hriaa MSL board lamin prog. tawi fel tak an duang kha kalphung thar chhunzawm zel tlak a ni.
Khatla TBL leh Zarkawt BCA club owner te hi Mizoram basketball chanchin ziahna, chhinchhiahna ah vawn reng an ni tawh dawn. Mizo thalai tana an insenna zawng zawng hi chhuan tam tak thlengin an la sawi ang.
Kan thalaite pumrua a lian tual tual a, game a thang a – hmathlir awmze nei zawk nen hma lam panin Mizo basketball in ke a chhep chho zel e.