March ni 12, 2026 zana Mizoram Super League (MSL) 11 khelhah, championship nomawi chawi tuma ramtiam lam hawia fehchhuak, Mission Veng Hotshot tan, veteran player chuai thei lo Moses-an a ban a phar chhuak a, MSL history a nih loh pawhin, MSL 11-ah bik hian player of the match lawmman hlu tak dawng zinga upa ber a ni zui!
Msv Hotshots 78 – 73 Saron BC
Moses Zoremmawia hian Saron BC lamin an lehthal dawna an lan laiin a hmangaih a club Hotshots tan 3 pts hlu tak tak hun tawp lamah a theh lut a, hun tawp hamrik a rik meuh chuan point 13, reb 10 a nei – minute 40 a khel bawk!
Msv Hotshots captain, Lalruatkima pawh a khel tha hle a, point 22 zet a thawh bawk. An super star D, Johnson erawh zan dang angin khel tha pup pup viau lo mah se, hun harsa leh a tawp lamah chuan a changtupa ni thei khawpin a khel tha leh!
Hotshots coach Ahruaia chuan inngaitlawm takin, “Hma lam pana kal bek bek kan tum zel e. Kan bul tan tirh ngaihtuah chuan tun dinhmun kan thleng thei hi ka lawm hle. Inham tan beisei ve ngam tawk khan semi finals kan thlir ve ngam ta lek lek e!” tiin fimkhur takin The Aizawl Post Hoops Mania zawhna a chhang.
Saron BC lam hian Marc Tetea Sailo kaihhruaina hnuaiah an game plan an hlawhtlinpui takzet a, hun tawp lamah Hotshots an tal pit a, rei tak an dan chah D. Johnson theih avangin chak thei dinhmunah an ding hial!
Saron BC tan Ramdinfela defense a ropui thlawt, point 13 a nei thei cheu – D. Johnson-a sapatal tur a titawp thei! Dan pangaiin Tea a khel tha leh a, point 18 a nei thei – an hnam dang player pathum erawhin beisei an pha lo! Mala pawhin point 14 neiin, a khel chhe lo.
Inkhel hmasa zawkah Chhinga Veng BC 70 – 87 Zarkawt BCA a ni. Beisei ang inkhel an chhawpchhuak lo va, inkhel a dul! BCA lamin an khelh chhiat tumah pawh champion an tum zia an tilang nawn cheu a, Chhinga Veng BC erawhin team an la insawhngheh loh tuarin an vanduai chhunzawm.
Afela enkawl Chhinga Veng BC hian point guard an neih mumal loh an tuar a, inhamtang thei dinhmuna ding tura thapui an chhuah a ngai chhunzawm ang.
BCA player khel chhe khat tak, Khatla South tlangval H. Lalhmachhuana chuan point 23 neiin player of the match a phu ang ngeiin a ni.
Zanina inkhel turte:
Saron BC Vs Chhinga Veng BC
MSV Hotshots Vs Zarkawt BCA