MSL XI tan ni March
ni 3, 2026 kan thleng ta!
Mingo chah chhuak hmasa ber Zemabawk BC
Zemabawk BC innghahna veng Zemabawk hian tunhnaiah infiamna huang piahah chanchin ngaihnawm leh chhinchhiahtlak zet an nei – faina lama an sulhnu tha tak leh entawntlak tak an chhawpchhuah mek hi a ni.
An veng sanitation committee-te hmalakna in hriat a hlawha an fak rawn mawlh mawlh lai hian infiamna lamah hnuhma lian deuh mai an nei mek bawk a, chu chu kan khel zui ang.
Mizoram Super League X khan an khawtlang phuarkhawmtu chu basketball a ni. He veng lian zet hi a leilung leh local council, YMA leh NGO ang zawngte in thendarh an ni ta a; mahse, then hran rual loh (undivided) nih tir tu leh he khawtlang suihkhawmtu chu Zemabawk BC hi a ni.
He club an thlawp that danah hian an veng hlimthla hi a lang tel. Mizoram Super League (MSL) X ah khan hmuh theihin a awm – semi final bik kha thlir ila, hlim takin khuang vaw ri bur bur karah fans ‘Zemabawk’ tia au rual ri te kha tanrualna thawm a ni.
R. Dengthuama Indoor Stadium chhungah khan ZBBC fans za rual fe an pungkhawm thin a, semi final game – 3 zana Zemabawk BC chak loh avanga an fans mittui nena haw te kha ZBBC puipa mai ni lo, he khawtlang hruaitute tan hian theihnghilh a har ang!
Hun thar, season thar, MSL 11 erawh kan chuang kai ta – ZBBC hian record thar tha siamna hun remchang an nei e.
Mizo zingah Mingo
MSL season 1 – season 10 khan foreign player tam tak an rawn inlan tawh a, heng foreigner te hi midum (black) an ni thin. Tun MSL 11-ah erawh thawnthu a dang a, Mizo zinga mingo khel turin Zarkawt BCA in Brazillian player leh Zemabawk BC lamin American an chah chhuak – Aizawl rawn rap hmasa zawk, American player chanchin hi thlurbing zuai teh ang.
Can White Man Jump?
Zemabawk BC player hi Carl James Snyder, fit 6’9 laia sang, California lam chhulchhuak a ni a, ani hian tun tum hi India ram a rawn rah vawi khatna a ni.
Foreign player dang ang lo takin, Pro Pastor bial thar vawng tur ang maia fai veng leh pawisawi lo zet sakhmel pu a ni a, testimony pawh sawi thut se a hmel en chuan a inhmeh thlup e. A vanglai leh thatlai hun hmangin, kum 26 val a ni.
Ani hi Jr. College, NAIA leh NCAA (Division 2) lamah te sulhnu lo nei tawhin, Mexico leh Canada lamah te pawh hun a lo hmang tawh thin. A suangtuahnaa lian ber NBA lamah erawh a inhlang kai ta lo!
South East Asia lam hawiin a huang a rawn zauh a – China, Singapore, Philipine, Malaysia, Indonesia-ah te inkhelin hun a lo hmang tawh thin. China league a khelhna thin chu Asia-ah chuan khirh a ti ber.
The Aizawl Post Hoops Mania hriat chak em em Carl hian sawiin – Asia khawmualpuia a inkhelh tawh thinna ah foreigner 3 leh a ram leilung fa 2 in MSL ang deuh roh tho in an khelh dan phung (system) duan a ni ve tho – leilung fate (son of the soil) thanna tur zawngin heng a tlawh tawh rama basketball a thuneitute hian an lo kalpui tih a hriat.
Hei hi Mexico ah pawh khelh thin dan a ni a; basketball boruak vungna ram Canada-ah erawh a thiam leh thei theiin an khelh mai zel – foreign player tana khelh phal lohna dan (restriction) a awm loh thu a sawi.
Philipine-ah chuan basketball hi an sakhua (religion) ang maia an ngaih thu leh, South East Asia-a boruak a san berna a nih thu Carl hian a tarlang bawk. Professional rilru a put mai bakah, ZBBC management team lamin an player hian inelna neih chhung chu pawn lam boruak a hip dawn pawhin club puipa lam kaihhruaina hnuaiah zel, an mingo pa mai bakah an inter state player-te zawm turin dan an duang a; holiday hmang ang maia hnam dang player man to tak takte thlah zalen an tum lo – he lai tak hi club dang tan pawha entawn tham a ni.
Hoops Mania Timeout
ZBBC Asst. Coach C. Vanengmawia chuan, “Kan player te tih takzetna leh taimakna hi fak ngei ngei an phu. Mihring mihrinna ah pawha mifel leh thahnemngai, club anga practice a awm loh pawha mahni thahnemngahna a chawl duh lo an ni hlawm hi lawmawm hle.
“Club owner leh management team lam an thawkrimin in an rintlak a, club a tana an inpekna ka fak hle. Practice-ah an telpui peih thlap thlap piah lamah, tul ang angah te an ruahmanna siam te a that avangin coaching staff lam tan a hahdamthla hle” tih thu a tarlang.
Big 3 inlan zan
MSL X zawh taka semi finalist ni pha thiau club pathum – Khatla TBL, Zarkawt BCA leh Zemabawk BC te an inlan nghal thawt dawn.
Inkhel hmasa zawk hi dar 5:30 pm ah khelh a ni dawn – MSL vawi 3 champion tawh Khatla TBL leh fans nei hlawm tha Saron BC innuai tur hi MSL 11 khuhhawn nan hman a ni dawn a, chak lo hmasa ber nih hi he team pahnih tan hian a fuh lo zui theih avangin inkhel hi a hmuhnawm ang.
TBL midum (black) nimin lamah a rawn thleng hman a, Saron BC hi tun dinhmuna chak lo tura rin lawk thu sawi ngam a ni; mahse, game a ni tlat!
Bul tanna duhthusam hi a awm a nih ngai chuan zanin dar 8 a khel tur, MSL X champion Zarkawt BCA leh tun inelnaa champion tuma tan la nasa MSL X semi finalist Zemabawk BC inhmachhawn tur tluka en chakawm hi a awm lo – dream start a ni e.
An tualchhung player an inngam tawn rualin an intluk tawk hle – mingo nei ve ve an ni a, bazar fuh zawk a lang dawn.
ZBBC supporter an thawhchhuah that chuan BCA kulhpui an nam thlu thei – MSL vawi 6 champion tawh erawh BCA an ni tlat!
Team list
1. R. Lalrinawma (Falkland)
2. Laldinsanga (Sihphir)
3. Stephen Lalnuntluanga (Zemabawk)
4. Jonathan C Lalnunmawia (Zemabawk)
5. Malsawmkima (Khatla East)
6. Jacob Lalhmingsanga (Mission Veng)
7. Lallianmawia (Chawnpui)
8. K. Lalthianghlima (Mission Veng)
9. Lalropuia (Khatla South)
10. Michael Lalthakima (Khatla South)
11. Rochansanga (Zemabawk)
12. Lalruatpuia (Zemabawk)
13. Pratyanshu Tomar (Karnataka)
14. Shashank J Rai (Karnataka)
15. Carl James Snyder (California, USA)
Head Coach – Liansangpuia (Ramhlun North)
Asst. Coach – C. Vanengmawia (Zotlang)
Manager – Malsawmtluanga (Zemabawk)
Physio – C. Lalhlimchhani (Zemabawk North)
Inkhel tur (March ni 3, 2026)
1. Khatla TBL Vs Saron BC – 5:30 pm
2. Zemabawk BC Vs Zarkawt BCA
March ni 4, 2026
1. Tuikual S BC Vs Mission Veng Hotshots
2. Chanmari BC Vs Chhinga Veng BC