MSSC-in kum 50 tlin a lawm
Mizoram State Sports Council (MSSC) chuan kum 50 a tling ta a, Thawhtanni tlai khan Golden Jubilee an lawm.
Jubilee lawmnaah hian MSSC president, Sports & Youth Services minister Lalnghinglova Hmar chu khuallian a ni a, chief minister hlui Lal Thanhawla, MSSC president hlui Robert Romawia Royte, MLA leh Zodintluanga Ralte, Lalrinsanga leh Rualchhina bakah sawm bikte, MSSC hnuaia affiliated state level sports association aiawhte an tel.
MSSC president chuan hruaitu hmasa thahnemngai tak takte thawhrim rah ropui tak an tel tih a sawi a. Golden jubilee an lawm rual hian, kum 50 lo awm leh tur, centenary hmel an hmuh hun atana an hmathlir an ngaipawimawh dawn tih a sawi.
“Mizo zingah infiammi tha tak tak kan nei tawh a, chutih rualin international chu sawi loh national level-ah pawh kan hlawhtlinna a la beitham hle a, tan kan lak nasat a ngai. Theihtawp chhuah kan tum a, tum mumal tak nen hmalam pana ke pen kan tum a ni,” a ti a. Kalphung tha zawk leh felfai zawk a awm theihnan theihtawp an chhuah a, thurawn pawh an la thei reng tih a sawi.
Mizoram leilungfate zingah Olympian pahnih chauh an la awm chu tlawmngaihthlak a tih thu sawiin, India ramin 2036 Olympic thlen tuma a beih meknaah he hun a lo thlen chuan Mizo thalai thahnem tak India aiawha an tel theihna turin hmathlir mumal tak nen hma a la mek tih minister hian a sawi a ni.
Mizoram State Sports Council hi 1976 April 20 khan executive order hmanga din a ni a. The Mizoram State Sports Council Act 2002 hmangin inrelbawlna leh kalphung mumal zawka tihchangtlun a ni. Tun dinhmunah MSSC hnuaiah hian state level sports association 34 an inziaklut a, jubilee pual hian kum khat chhungin sports association tin hian state huap tournament pakhat theuh an buatsaih a ni.
The Mizoram State Sports Council Act 2002 chuan Sports & Youth Services minister apiang ex-officio president atan a ruat a; secretary leh finance secretary chu sawrkarin a ruat. Vice president leh joint secretary chu MSSC member zing atangin thlan chhuah an ni.
Council hian president 19, vice president 12, secretary 12, joint secretary 8, treasurer 7 leh finance secretary 6 an awm tawh a. Council member chu za chuang an awm tawh.
Council hi Sports & Youth Services department (secretariat leh directorate) hnuaia awm a ni chungin, mahnia inrelbawl thei tura thuneihna sang tak nei a nih angin MSSC Act 2002 bakah MSSC Rules 2005 a nei a. Thawktute tan Recruitment Rules hranpa neiin, Selection Committee hmangin thawktute service kaihhnawih chinfel thin a ni.
Office record hmuh theih chinah MSSC-in annual budget a neih hriat hmasak ber chu, 1983- 1984 sawrkar kum a ni a, hemi kum hian cheng nuai 2.70 a nei ve. Budget a pung chho ve zel a, 2003- 2004 ah chuan nuai 106, 2023-2024 ah chuan nuai 1299.41 a ni tawh. Kum kal mekah hian nuai 1378.54 a ni. Council rorel bawhzui turin officer 6, regular staff 29, contract 3, provisional employee 37, muster roll employee 3, PMJVK ward staff 3 an awm a. Pensioner 24 an awm ve tawh. Kum 50 a tlin kumah pawh ama pualin office building hranpa a la nei lo thung.
MSSC Golden Jubilee pual hian 2025 April 22 khan khan Golden Jubilee Torch (meichher) relay neih a ni a, Bawngkawn atanga tanin sports association 34 aiawhten Aizawl khawpui chhungah meichher inpe chhawngin, Sports minister Lalnghinglova Hmar chuan Aizawl Tennis Court-ah a tlanluh pui a ni.
MSSC Golden Jubilee lawmnaah hian MSSC hruaitu hluite leh hruaitu ni mekte chawimawina hlan an nih bakah national level chin chunglama Mizoram tana hlawhtlinna changte chawimawi an ni a, MSSC Award sem nghal a ni bawk.
MSSC Award dawngtute:
MSSC SPORTSMAN OF THE YEAR AWARD 2025
C. Lalramsanga – Badminton (Trophy & Rs. 150000)
MSSC SPORTSWOMAN OF THE YEAR AWARD 2025
Lalremsiami Hmar – Hockey (Trophy & Rs. 150000)
MSSC MOST PROMISING SPORTSMAN OF THE YEAR AWARD 2025
H Lalthazuala – Badminton (Trophy & Rs. 80000)
MSSC MOST PROMISING SPORTSWOMAN OF THE YEAR AWARD 2025
Lalrempuii – Badminton (Trophy & Rs. 80000)
MSSC SPORTS TEAM OF THE YEAR AWARD 2025
Mizoram Amateur Taekwondo Association Team (Trophy & Rs. 100000)
MSSC COACH OF THE YEAR AWARD 2025
Lalinpuia – Taekwondo (Trophy & Rs. 80000)
MSSC LIFETIME ACHIEVEMENT AWARD
Lal Thanhawla (Trophy & Rs. 100000)
MSSC BEST PERFORMING SPORTS ASSOCIATION OF THE YEAR AWARD 2025
All Mizoram Karate Association (Trophy & Rs. 200000)
MSSC SPORTSPERSON OF THE YEAR FOR PERSONS WITH DISABILITIES AWARD 2025
David Lalremruata – Judo (Trophy & Rs. 100000)
MSSC SPORTS PROMOTER OF THE YEAR 2025
Dr Lalmuanpuia (L) (28.06.1977 – 25.01.2026) Trophy & Rs. 50000