MSSSB-in hna lak tur tih thih a nei
– Chief minister
ZPM sawrkarin a thiah tak Mizoram Subordinate Services Selection Board (MSSSB) chuan hna lak tur a huna bawhzui loh vanga tih thih a neih bakah a hna a muang niin chief minister Lalduhoma chuan a sawi.
Assembly Sessoin neih zawk taka a sawi danin chief minister hian, mi thenkhatin MSSSB kha Mizoram Public Service Commission (MPSC) aia chak leh rintlak zawk anga ngai an awm niin lang mah se, khaikhina ralah an ‘perfomance’ a tha vak lo nia ngaih theihin a sawi.
MSSSB hian direct recruitment-a lak tura an hnena thleng, proposal 4 – Home department Sainik Welfare & Resettlement hnuaia head assistant, Health & Family Welfare department-a psychiatric nurse leh social worker, AH&Vety hnuaia laboratory technician an kawl hlum tih a sawi.
Kum 2021- 2022 chhung khan MPSC-in advertisement 7 a tihchhuah laiin, MSSSB hian 5 a tichhuak a; 2022- 2023 ah MPSC-in advertisement 12 tichhuakin MSSSB-in 5; 2023- 2024 ah MPSC-in advertisement 31 tihchhuakin MSSSB-in 9 a tichhuak tih a sawi bawk.
“MPSC-in MSSSB atangin hna lakna tur proposal 19 a chhawm a, heng zingah hian post 4 chu MSSSB-in a kawl laia sawrkar approval lo thi hman tawh a awm avangin revalidate a ngai a ni,” chief minister hian a ti. MSSSB atanga post 19 lakchhawn atang hian MPSC-in post 12 exam a conduct tawh tih a sawi a ni.
MSSSB hunlai hian negative marking awm loin multiple choice questions (MCQ) exam kalpui thin a ni a, khawl hmanga endik thin a nih avangin result pawh a chhuak zung zung thin a. MPSC chuan negative marking awm loa MCQ ringawta candidate-te exam tur chu him loa hria in, MCQ chungchangah hian mipui a berawn a, chhanna petu zaa 70 chuangin negative marking tela MCQ hman an duh avangin hemi chungchang hi sawrkarah thlen a ni a, sawrkar thu ngaihchan mek a ni tih Lalduhoma hian a sawi.
MSSSB-in hna lak tur tih thih a nei – Chief minister
