Dan awmsa kalha Mizoram State Commission for Women (MSCW) chairperson ruat a nih vanga ruatna thu sut leh tura Mizo Students’ Union-in sawrkar a phutna chu an thlawp tih MNF Thalai chuan an sawi.
MNF Thalai Hqrs. thuchhuak chuan, MSWC chairperson chu kum 3 term emaw kum 65 tlin hma an ni thei ang, tiin, kumin March 8-ah appointment order pek a ni a, appointment order-ah hian chairperson term chu kum 3 emaw kum 65 tlin hma zawk zawk a ni ang, tia tarlan a ni tih a sawi.
‘Hemi chungchanga dik lo taka induhsakna leh thil dik lo a awm avanga ban tura MSU-in sawrkar a ngenna hi kan thlawp a, Mizoram sawrkar chu MSU ngenna tihhlawhtling thuai turin kan phut a ni,’ a ti.
Pi C Lalchhandami hian kum chi hrang hrang a nei tih MNF Thalai hian sawiin, ‘Economics & Statistics department-a thawk thin a nih vang hian dik lo takin remchanna a lei ta mai em ni,’ tiin a zawt.
Sawrkar hna atangin 2016 March 31-ah supernuation-in a pension a, a pension kum atanga chhutin kum 68 a ni tawh a. AMC Election 2021-a candidate a nih laia a chanchin ziahna pamphlet sem anga chhut pawhin tunah kum 66 a ni tawh tih a sawi a. MSWC chairpersion ni tur hian eng birth certificate nge a hman tih MNF Thalai chuan a zawt bawk.
‘Mi pakhatin a mimal hamthatna tura sawrkarah kum chi khat aia tam a hman hi thil dik a ni loa, induhsakna uchuak tak lantirna liau liauah kan ngai,’ a ti.
MSU hmalakna MNYF-in thlawp
