MTA-in Kristian sakhua nekchep theite nen thawk dun lo turin ngen

Mizo Theological Association chuan sakhua leh Chanchintha nekchep thei tur pawlte nen inthlan hma leh inthlan hnu ah thawk dun lo turin an ngen tih an sawi.
Kohhran pawl hrang hranga theologian-te telna Mizo Theological Association (MTA) chuan MLA inthlanpui atana thuchah 10 a tichhuak a. ‘Kristian ram kan nih anga inthlan thianghlim, dik leh fel a awm theih nan ngaipawimawh a, zawm turin mipui kan ngen,’ a ti.
Ram chu Lalpa ta, (I Chro 29:11) ram rorelna pawh Pathian ta a ni. ‘Chungnungbera chuan mihringte lalna ram chungah thu a nei a ni’ (Dan 4:25) a nih angin, ram roreltu ni tura kan beihna leh roreltu tur thlan kawngah ram leh rorelna chu Pathian thuneihna hnuai a ni tih hrereng turin a chah.
Roreltute chu mipui himna leh thatna tura Pathian ruat an ni a. Engkim chunga thuneitu, a duh apiang hnena lalna leh thuneihna pe theitu chu Pathian a ni, tiin, ‘Pathianin kawng hrang hrangin roreltute a ruat thin a, tun huna roreltu min ruatsak dan chu mipui duhthlanna hmangin a ni. Chuvangin kan duhthlanna thiang hruai khawlo thei, sum leh pai leh therhhlo emaw chi leh sakhaw bil nihna emaw a bika kan hlawkna tur emaw ngaihtuahna dahtha in, kan rilru duhthlanna thianghlim takin kan ram tana tha ber tur nia kan hriat thlang ang u,’ a ti.
Sum ngainatna chu sual tinreng bul (I Tim 6:10) a nih avang leh sum thianghlim lo in rorelna a hruai khawlo thin a; duhamna chu milem biakna (Kol 3:5); Pathian leh sum rawng bawl kawp thei kan nih loh (Matt 6:24) angin, sumin rorelna a hruai dik lo sam hle tih hria a, roreltu tur kan thlan kawngah sum hmachhuan leh sum uma engmah ti loa fimkhur turin mitin an chah.
“Dik taka lalin ro a rel chuan ram a phuisui a, thamna a lak chuan ram a tluchhe thin” tih chu Pathian thudik ding reng a ni, tiin, ‘Dik taka rorelna hi ram hmasawnna leh hmuingilna a ni a, rorelna dik lo hnuaiah ram a hrehawmin a rethei thin. Dik taka rorel tur mi chuan dan dik takin lalna chan tumin a bei ang. Dawt leh inbumna, mite sawichhiat leh hmanraw dik lo pawh hmang hreh lo mi chuan dik taka ro a rel theih a beiseiawm loh avangin chutiang tih chingte chu hnawl ngam ang u,’ a ti.
Ram roreltu tura inpete atanga beiseina dik lo neih chu mipuiin roreltute an hruaisualna a ni thin a. Mimal leh eng pawl mahin MLA candidate emaw an thuihruaite emaw hnena sum leh therhlo dil chu thil tha lo a ni tih MTA hian a sawi.
Sum leh therhlo hmang emaw, eng thil emaw inpek tiam zawnga campaign chu a tling lo tan insenthlawnna mai a ni a, a tling tan pawh sum sen tawh rulh lehna tura mipui sum dik lo taka hman sualtirtu a nih thin avangin, hetiang hmanga campaign lo turin an ngen.
Chi leh sakhua (kohhran) inkara inhuatna thlen thei zawng emaw mahni mimal hlawkna tur zawnga chibing leh sakhaw pawl rilru chawk tho zawnga politics hman chu a tha lo a, mi tlemte hlawkna tura mi tam tak buaina thlen thintu a nih avangin hetiang laka inveng turin an chah.
Dan loa sumdawngte leh ruihhloa sumdawngte nena engti kawng maha inthurual lo turin party tin leh candidate zawng zawng an ngen a; hetiang mite puihna sum leh pai pawh hnawl ngam turin an ngen.
‘Kan sakhua leh Chanchintha nekchep thei tur pawlte nen inthlan hma leh inthlan hnu ah pawh thawk dun hauh lo turin kan ngen a. Vote thlak hi kan dikna chanvo leh khua leh tui kan nihna anga kan mawhphurhna a ni a, mitinin vote thlak theuh ang u,’ an ti.