MTKP inkhawmpui tan dawn
Zanin, February 13 zan atang hian Lunglawn Mual Lungleia neih tur Mizoram Thalai Kristian Pawl (MTKP) Inkhawmpui vawi 48-na neih a ni dawn a. Palai kal tum in report hi 5600 chuang an ni.
MTKP hruaitute sawi danin, inkhawmpuiah hian Lunglei khaw pawn atanga riaklut tura in report bakah hian Mizoram pawn atangin khualtha lokal tura in report 30 chuang an awm a. Mizorama kohhran dang Presbyterian Kohhran atangin Central KTP, Lairam Isua Krista Baptist Kohhran, Evangelical Church of Maraland, Bru Baptist Thalai, Chakma Baptist leh IKK Thalai pawhin palai an tir dawn a, Mission Field zaipawl an tel dawn bawk.
Inkhawmpui pandal “Krista Pasalthate Rûn” ah hian mi 8000 – 9000 inkar vel leng tura beisei a ni a, pandal hi peihfel a ni tawh. Pandal extension hi ceilling hmanga siam niin, pandal-ah hian carpet phah a ni.
MTKP Inkhawmpui vawi 48-naah hian “Pathian hnaih rawh u” tih thupuia hman a ni a, zanah palai lawmna leh report pek inkhawm a ni anga, naktuk – Zirtawpni ah Rorel inkhawm neiin, Inrinni leh Pathianni ah Pathian biak inkhawm a awm anga, Pathianni zan thleng a awh ang.
Mizoram Thalai Kristian Pawlah hian tunah member 50364 awmin, hmeichia 19802 leh mipa 30562 an ni a; Unit 447 awmin Bial 92 an awm a ni.
MTKP inkhawmpui tan dawn
