Pathianni Turkish Super Lig match pakhatah thil duhawm lo thlengin, mikhual Fenerbahce laka 3-2-a Trabzonspor tlawmna inkhel tawp rualin mualneitu team tantu engemawzat khelmualah an tlanlut a, Fenerbahce player an khawih phak chin chin an an bei a, hliam na an awm hriat a ni lo a, thil thlen dan chhuichian mek a ni.
Papara Park-a thil thleng chungchangah Turkey Interior Minister Ali Yerlikaya chuan X kaltlangin demna thu a tarchhuak a, sport chu gentleman nihna nena kalkawp tlat a nih thu leh football khelmuala tharum thawhna thleng reng reng pawmzam theih a nih ngai loh thu a sawi a, investigation kalpui mekah khelmual chhunga tlanlutte chhui hmasak phawt an nih thu leh inkhelh bana thil thlen dan enchian nghal a nih thu a sawi.
He inkhelah hian Fred-a goal hnih tihluh hmangin half time-ah mikhual Fenerbahce lamin sihnih faiin hma an hruai zet a, second half-ah Bardhi leh Trezeguet chuan home team siphurh sutna goal khat ve ve thawh lehin, minute 87-a Batshuayi chakna goal khung zawh rual chiahin stadium chhung boruak a tang nghal a, Trabzonspor supporter lawm loin khelmual chhungah an hmuh phak bungrua an vawmlut tan a, inkhel tawp rualin khelmual chhungah an tlanlut a, tlanchhe vawn vawn khawpin Fenerbahce player an umkual!
Turkish Football Federation chuan thil thleng kha engti kawng maha pawmzam theih loh a nih thu sawi chungin buaina chhuaka mawhphurtute chu criminal hremna ngei an pek tur thu an tarlang.
2023-24 season-ah Turkish league hian sawi neuh neuh buaina a tawk ngun hle a; nikum December thla pawh khan referee Halil Umut Meler chu MKE Ankaragucu president Faruk Koca chuan kut a thlak a, Super Lig fixture khelh hmabak an chawlh phah thup nghe nghe.
Fenerbahce hian khelh 30-a point 79 hum chungin Super Ligsit table-ah pahnihna an luah mek a, point hnihin hmahruaitu Galatasaray an pha lo a, pathumna Trabzonspor lakah point 30 ngawtin an sang thung!
Mual chhunga buaina siam Trabzonspor fan rual
